Նոր բացահայտում. Քաղաքապետարանի հետ պայմանագիր են կնքել «Փարկինգ սիթի սերվիս»-ն ու «Լոտակոր»

Իրավաբան.net-ի ձեռքում է հայտնվել Երևանի քաղաքապետարանի և «Փարկինգ Սիթի Սերվիսի» միջև կնքված պայմանագիրն ամբողջությամբ:

Պարզվում է Երևանի քաղաքապետարանը Երևան քաղաքում ավտոկայանատեղիների կազմակերպման ծառայությունների համար պայմանագիր է կնքել միաժամանակ 2 ՓԲԸ-ների հետ` «Փարկինգ Սիթի Սերվիսի» և «Լոտակոր»-ի: Ըստ Էլեկտրոնային ռեգիստրի տվյալների`  «Լոտակոր»-ը գրանցված է 2007 թվականից և ունի 4 բաժնետեր' Արման Խաչատրյանը, Անի Եղիազարյանը, Վլադիմիր Սոֆյանը, Էդիտա Ղարագյոզյանը: Այդքան տարիների ընթացքում որևէ բաժնետեր չի փոփոխվել:

Ըստ http://www.locator.am/`«Լոկատոր» ՓԲԸ-ն առաջարկում է տրանսպորտային միջոցների երթուղայնացման և կառավարման համակարգ, որն օգտագործում է GPS / GLONASS դիրքորոշման համակարգի և բջջային հեռախոսացանցի ռեսուրսները (GSM GPRS):

Երևանի քաղաքապետարանն այդ երկու ՓԲԸ-ների հետ Երևան քաղաքում ավտոկայանատեղիների կազմակերպման ծառայությունների համար պայմանագիր է կնքել 10 տարով, ընդ որում' յուրաքանչյուր տարի պետք է կնքվի առանձին ծառայությունների մատուցման համաձայնագիր' հաշվի առնելով ՓԲԸ-ների ֆինանսական միջոցները:

Ի դեպ, Երևանի քաղաքապետրանը կարող է միակողմանի լուծել պայմանագիրը, եթե Կատարողն էականորեն խախտել է պայմանագիրը: