Դատվում է քաղաքապետի խորհրդականը՝ զինծառայողին բնակտարածությունից զրկելու համար

Կոտայքի մարզի ընդհանուր իրավասության դատարանում շարունակվում է զինծառայողի ընտանիքին բնակելի տարածությունից զրկելու վերաբերյալ քրեական գործով դատավարությունը, որով անցնում է Բյուրեղավանի քաղաքապետի արդեն նախկին խորհրդական Արթուր Ղալայանը։

Նախաքննական մարմինը պարզել է, որ հենց Ա. Ղալայանի գործողությունների հետևանքով է Պետունցների ընտանիքը զրկվել սեփական բնակտարածությունից։

Բյուրեղավան քաղաքի 1-ին հանրակացարանի բնակիչ Հերմինե Պետունցը, որն իր զինծառայող ամուսնու հետ ժամանակավոր Լեռնային Ղարաբաղում բնակվելուց հետո վերադառնալով պարզել էր, որ հանրակացարանի իր բնակարանն այլևս իրենցը չէ։ «Ես զարմացա, անմիջապես վերադարձա Բյուրեղավան, տեսա՝ իրականում մեր դռան փականը կոտրել են, բացել են, իսկ բնակարանն էլ վաճառվել է Դերո անունով մեկին՝ 650 000 դրամով: Ինչպե՞ս կարելի է վաճառել բնակարանը, եթե ես իմ չորս երեխաների հետ հաշվառված եմ այդ բնակարանում, և բնակարանը պատկանում է ինձ»,- մամուլին պատմել էր Հերմինե Պետունցը ու հանցագործության մասին հաղորդում ներկայացրել Կոտայքի դատախազին։

Քաղաքացու հաղորդման հիման վրա իրականացված քննությամբ պարզվել էր, որ, իրոք, 2005-ին Բյուրեղավանի քաղաքապետի կողմից իրենց ընտանիքին է հատկացվել նշված հանրակացարանի 14 սենյակը, որտեղ ապրել են մինչև 2009 թվականը, այնուհետև տեղափոխվել ու բնակություն են հաստատել ԼՂՀ-ում, քանի որ զինվորական ամուսինն այնտեղ է աշխատել, իսկ այդ ընթացքում բնակարանը Բյուրեղավանում հատկացվել է այլ անձի։

Քաղաքապետի խորհրդական Արթուր Ղալայանը, ինչպես տեղեկացրել են դատախազությունից, Բյուրեղավանի քաղաքապետի թիվ 8 կարգադրությամբ միաժամանակ իրականացրել է համայնքային սեփականություն հանդիսացող հանրակացարանները հաշվառելու, բնակիչներին սենյակներ հատկացնելու փաստաթղթերը, սենյակների փաստացի օգտագործումը ստուգելու, ինչպես նաև պետական բաշխումը կազմակերպելու հանձնաժողովի նախագահի պարտականությունները եւ հենց նրան էլ մեղադրանք է առաջադրվել քաղաքացուն՝ բնակարանից զրկելու համար։

Առաջադրված մեղադրանքի համաձայն, Ա.Ղալայանը 12.04.2010թ նույն հանրակացարանի լիազոր ներկայացուցիչ Արթուր Հայրապետյանից պահանջել է տրամադրել իրավունք վերապահող կեղծ հավաստագիր այն մասին, որ Բյուրեղավան քաղաքի 1-ին հանրակացարանի 14 սենյակում 2006թ ոչ ոք չի բնակվում, որից հետո 16.04.2010թ առանց անձնագրային բաժանմունք հարցում կատարելու, իրավունք վերապահող կեղծ զեկուցագիր է կազմել այն մասին, որ Բյուրեղավան քաղաքի 1-ին հանրակացարանի 14 սենյակում հաշվառված անձինք չկան և դա Ա. Հայրապետյանի կողմից տրված հավաստագրի հետ միասին ներկայացրել է Բյուրեղավան քաղաքի քաղաքապետ Հակոբ Բալասյանին, որի արդյունքում Բյուրեղավան քաղաքի բնակչուհի Բավական Հարոյանին ժամանակավոր կացարանով ապահովելու հարցը 2010թ սեպտեմբերի 14-ին ներկայացվել է ավագանու նիստին։ Արդյունքում, Բյուրեղավան քաղաքի 1-ին հանրակացարանի 14 սենյակը ժամանակավորապես բնակվելու նպատակով հատկացվել է Բ. Հարոյանին և նրա ընտանիքի անդամներին, ինչի արդյունքում նույն սենյակի վրա դեռևս 2005թ հաշվառված Հերմինե Երվանդի Պետունցը և նրա անչափահաս երեխաները զրկվել են բնակվելու համար իրենց հատկացված բնակելի տարածության իրավունքից:

Քաղաքապետի նախկին խորհրդրականին մեղադրանք է առաջադրվել պաշտոնական փաստաթղթեր կեղծելու համար։ Գործը վարույթ է ընդունել դատավոր Վաղինակ Մկրտչյանը։

Հեղինակ` «Փաստինֆո»