Քննիչները չեն շտապում Խուդյանի գործով փորձագետներին տրամադրել ելակետային տվյալները

«Արին Կապիտալ» ներդրումային ՍՊ ընկերության վերաբերյալ հարուցված քրեական գործով նշանակված համալիր փորձաքննության կատարումը գտնվում է ընթացքի մեջ՝ համալիր փորձաքննությանը պարբերաբար տրամադրված փաստաթղթերում արտացոլված տվյալների ուսումնասիրման փուլում: Այս մասին «Փաստինֆո»-ի հարցմանն ի պատասխան այսօր հայտնեց Փորձաքննությունների ազգային բյուրոյի մամուլի քարտուղար Լանա Մշեցյանը: Համալիր փորձաքննությունն ավարտին հասցնելու համար, ըստ նրա, անհրաժեշտ է, որպեսզի նախաձեռնողը՝ քննիչը, փորձաքննության կատարմանը տրամադրի փորձագետների միջնորդություններում պահանջված փաստաթղթերն ամբողջությամբ, որոնց ուսումնասիրությունից հետո, փորձագետ շինարարները և ապրանքագետները հնարավորություն կունենան հետազոտվող ժամանակաշրջանում Երևանի Մաշտոցի թիվ 33/1 և թիվ 33Ա հասցեի շենքերում կատարելու տեղազննություն:

Անհրաժեշտ է նաև համախառն եկամտի և դրանից նվազեցման ենթակա ծախսերի հաշվարկման և հաշվառման հետ առնչություն ունեցող անձանց հարցաքննության միջոցով ձեռք բերված ելակետային տվյալները տրամադրել փորձաքննության կատարմանը, որը, ըստ քննիչի, կտրամադրվի 2013թ. հոկտեմբեր ամսվա երկրորդ կեսին: Ըստ Լ.Մշեցյանի՝ վերահիշյալ փաստաթղթերը և հարցաքննության միջոցով ձեռք բերված ելակետային տվյալներ, տեղեկություններ ներկայացնելուց հետո՝ շուրջ երկու ամսվա ընթացքում, հնարավոր կլինի շենքերում իրականացնել տեղազննություն և չափագրում` փորձագետին առաջադրված հարցերի շրջանակներում:

Հիշյալ գործողությունները կատարելուց հետո նոր միայն փորձագետները հնարավորություն կունենան հավաքագրված տվյալները` հաշվապահական ու հարկային հաշվառման և տնտեսագիտական, ինչպես նաև շինարարական ու ապրանքագիտական ոլորտներում գործող և սույն համալիր փորձաքննությանն առաջադրված հարցերին վերաբերող նորմատիվ ակտերի շրջանակներում ենթարկել համալիր վերլուծության, որը հնարավորություն կընձեռի մինչև 2013թվականի դեկտեմբերի 20-նն ընկած ժամանակահատվածում ավարտին հասցնելու սույն փորձաքննությունը:

ՀՀ ԿԱ ՊԵԿ-ի քննչական ծառայությունում քննվող «Արին Կապիտալ» ներդրումային ՍՊ ընկերության վերաբերյալ 03.05.2011թվականին հարուցված քրեական գործով՝ ՀՀ ԿԱ ՊԵԿ-ի քննչական վարչության ավագ քննիչ Տիգրան Հարությունյանի կողմից 18.10.2012թ.-ին նշանակվել է դատահաշվապահական, ֆինանսատնտեսագիտական, շինարարատեխնիկական և ապրանքագիտական համալիր փորձաքննություն: