Վարդան Բոստանջյանը կարծում է, որ Հայաստանին ԱՄՆ-ի կողմից տրվող օգնության չափը չի փոխվի

ԲՀԿ խմբակցության պատգամավոր, տնտեսագետ Վարդան Բոստանջյանը, «Չորրորդ ինքնիշխանություն» թերթի հետ զրույցում մեկնաբանելով ԱՄՆ նախագահ Բարաք Օբամայի կոչը՝ կրճատել Հայաստանի տնտեսական օգնությունը 19 տոկոսով, ասել է, որ դրա պատճառը ԱՄՆ-ում բյուջեի մասով զսպողական քաղաքականության որդեգրումն է։

«Դրանով պայմանավորված' երկրի նախագահը կարող է նման առաջարկությամբ հանդես գալ, բայց դա դեռ ոչինչ չի նշանակում: Հարցը դեռ Կոնգրեսում պետք է քննարկվի, եւ ամեն ինչ կարող է փոխվել, նման դեպք եղել է: Մասնավորապես անցած տարի, էլի ավելի զուսպ թվերով էր հարցը մտել Կոնգրես, այնտեղ, սակայն, գումարը մեծացրին: Ես կարծում եմ՝ կլինի մոտավորապես այնքան, ինչքան եղել է նախորդ տարի»,-ասել է նա։

Մեկնաբանելով նույն հարցի վերաբերյալ նախկին վարչապետ Հրանտ Բագրատյանի կարծիքը, որ 1995-ի համեմատ (երբ Հայաստանին ԱՄՆ-ի կողմից տրվող օգնությունը կազմում էր 150 մլն դոլար) օգնության ծավալի փոքրացումը վկայում է այն մասին, որ Հայաստանն  ԱՄՆ–ի համար այլևս իրենից կարևորություն չի ներկայացնում, Բոստանջյանն ասել է. «Հատկացման կրճատման արդյունքը հետեւյալն է. ընդհանրապես նման տիպի օգնությունները, որպես կանոն, միշտ միտում ունեն փոքրանալու: Հրանտ Բագրատյանն էլ շատ լավ գիտի դրա մասին: Դա ոչ թե պայմանավորված է որեւէ մեկի անձով կամ ժամանակահատվածով, պարզապես այդ օգնությունները աստիճանաբար նվազում են: Այդ ամենը նվազման միտում ունի, եւ սա ոչ միայն օգնությունների մասով կարող եմ ասել, այլ նաեւ վարկերի: Դրանք էլ զսպվելու միտում ունեն, որովհետեւ արտաքին աշխարհն ասում է' դուք, ըստ էության, փաստորեն, ի զորու եք կամ ժամանակն է, որպեսզի կարողանաք ռացիոնալ ծախսումներով հասնել ավելի մեծ արդյունքների: Հատկացվող գումարների նվազման տենդենցը կա, եւ այս պարագայում պետք չէ հարցը քաղաքականացնել»:շ