ԱՄՆ-ն այսօր Հայաստանը համարում է պակաս կարևոր, քան 1990-ականների սկզբին. Հրանտ Բագրատյան

ՀՀ նախկին վարչապետ, Հայ ազգային կոնգրեսի անդամ Հրանտ Բագրատյանը «Չորրորդ ինքնիշխանություն» թերթի հետ զրույցում անդրադառնալով ԱՄՆ նախագահ Բարաք Օբամայի կոչին՝ կրճատել Հայաստանի տնտեսական օգնությունը 19 տոկոսով, ասել է. «Ես մի բան կարող եմ ասել' այդ թիվը վերջին 15-16 տարում 150 միլիոնից ի վերջո դարձավ 27 միլիոն ԱՄՆ դոլար»։ 

Հարցին, թե այնուամենայնիվ ո՞րն է ԱՄՆ-ի նման մոտեցման պատճառը, Բագրատյանն ասել է, որ Հայաստանն այսօր չունի այն կարևորությունը, որն ուներ 1994-1995 թվականներին։ 

«Ես, իհարկե, չգիտեմ, գուցե այս տարվա կրճատումը ընդհանուր կրճատման արդյո՞ւնք է: Պետք է տոկոսները նայել' ամերիկյան բյուջեն կրճատվո՞ւմ է 11 տոկոսով, թե՞ ոչ: Ես գիտեմ բյուջեում գրանցված ընդհանուր թվերը, եւ նման կրճատումներ ամերիկյան բյուջեում չկան: Ամերիկայի բյուջեն աճում է բացարձակապես եւ նվազում է հարաբերականորեն, այսինքն' բացարձակ թվով իրենց բյուջեն աճում է: Հարաբերականորեն ասելով' նկատի ունեմ, որ տնտեսական աճը մի փոքր պակասում է իհարկե: Մեր թիվը ե՛ւ բացարձակապես է պակասում, ե՛ւ հարաբերականորեն է պակասում: Իսկ սա նշանակում է, որ այստեղ մի բան կա: 1995 թվականին տալիս էին շուրջ 150 միլիոն ԱՄՆ դոլար, հիմա տալիս են 27 միլիոն դոլար: Եվ դա նշանակում է, որ մեզ համարում են պակաս կարեւոր»: