ՀՀ Տրանսպորտի և կապի նախարարությունում նույնիսկ տեղյակ չեն, որ իրենք ամենաանպարտաճանաչն են

ՀՀ Կառավարության պաշտոնական կայքէջում հրապարակվել է 2011թ. Գործադիրի հանձնարարականների կատարման վերաբերյալ տեղեկատվություն: Կառավարության հանձնարարականները սահմանված են «ՀՀ Կառավարության 2011 թվականի գործունեության միջոցառումների ծրագիրը եւ գերակա խնդիրները հաստատելու մասին» որոշման մեջ:

Տարբեր գերատեսչությունների տրվել էր ընդամենը 146 հանձնարարական, որոնք բոլորն էլ կատարվել են, սակայն 21 հանձնարարական կատարվել է ուշացումով:

Տրանսպորտի եւ կապի նախարարությունն ամենաշատ հաձնարարական ստացածների թվում է (թվով՝ 12), այնինչ՝ ամենաշատն է ուշացումներ թույլ տվել: Նախարարությունն ուշացումով է կատարել 8 հանձնարարական, որից 5-ը ուշացրել է 1 ամսից ավելի: Ուշացումների մի մասը վերաբերում է լիցենզավորման դաշտի կանոնակարգմանը:

Լուրեր.com-ի թղթակիցը զանգահարել է նախարարության «Հասարակայնության հետ կապերի» վարչություն՝ պարզելու, թե որո՞նք են եղել վերջինիս կողմից հանձնարարականների կատարման ուշացման պատճառները։ Սակայն, հեռախոսազրույցից պարզ դարձավ, որ նախարարությունում նույնիսկ տեղյակ չեն Գործադիրի հրապարակած տվյալներին։