Մեկնարկեց Թվինինգ ծրագրային առաջարկների ներկայացման գործընթացի հերթական փուլը

Մարտի 1-ին, ՀՀ էկոնոմիկայի նախարարության մեծ դահլիճում կայացավ Եվրոպական հարևանության և գործընկերության գործիքի (ԵՀԳԳ) ներքո իրականացվող Թվինինգ ծրագրի շրջանակներում ծրագրային առաջարկների ներկայացման գործընթացի հերթական փուլի պաշտոնական մեկնարկի արարողությունը՝ ղեկավարությամբ ՀՀ էկոնոմիկայի նախարարի տեղակալ Գարեգին Մելքոնյանի:

Միջոցառման ընթացքում ծրագրի ազգային համակարգող հանդիսացող ՀՀ էկոնոմիկայի նախարարության կողմից շահառու մարմինների ներկայացուցիչներին ներկայացվեց Թվինինգ ծրագրի իրականացման նպատակն ու ընթացակարգերը, ինչպես նաև նոր ծրագրային առաջարկների մշակման մեթոդաբանությունն ու քայլերը: Ծրագրային առաջարկների ներկայացման համար սահմանած է 60-օրյա ժամկետ:

Միջոցառմանը մասնակցեցին ՀՀ գերատեսչությունների, պետական այլ մարմինների և ՀՀ-ում ԵՄ պատվիրակության ներկայացուցիչներ:

ԵՀԳԳ ներքո իրականացվող Թվինինգ ծրագրերը Հայաստանում գործնականում սկսել են իրականացվել 2009թ.-ից: Այս գործիքի նպատակն է ՀՀ պետական կառավարման մարմիններում ինստիտուցիոնալ բարեփոխումների իրականացումը՝ ԵՄ ստանդարտներին ու գործող մոդելներին համապատասխան, ՀՀ օրենսդրական դաշտի մոտարկումը ԵՄ համընդհանուր օրենսդրությանը: Ներկայումս արդեն իսկ կա ավարտված մեկ Թվինինգ ծրագիր, ևս 14 ծրագրեր գտնվում են իրականացման տարբեր փուլերում: