Բոսնիացի սերբերի բանակի նախկին գեներալ Կրստիչը 25-ամյա բանտարկության պատիժը կկրի Լեհաստանում

Աշխարհ 26 Մայիս, 2014 21:37

Բոսնիացի սերբերի բանակի Դրինյան զորակազմի նախկին հրամանատար Ռադիսլավ Կրստիչը պատիժը կկրի Լեհաստանում 25 տարվա ազատազրկման տեսքով:

Բոսնիացի սերբերի բանակի նախկին գեներալ Ռադիսլավ Կրստիչը Նախկին Հարավսլավիայի համար միջազգային քրեական տրիբունալի կողմից դատապարտվել է 35 տարվա բանտարկության, սակայն Լեհաստանում նման պատիժ չկա: Դրա պատճառով դատարանն ստիպված է եղել տրիբունալի դատավճիռը հարմարեցնել ներքին իրավունքին:

Հաշվի առնելով, որ Կրստիչը բանտարկության մեջ է գտնվում 1998 թվականից, Լեհաստանի բանտում նա կարող է գտնվել 9 տարի: Դրանից հետո Միջազգային տրիբունալը պետք է վճիռ կայացնի բոսնիացի գեներալի հետագա ճակատագրի մասին:

Բոսնիայում և Հերցեգովինայում հակամարտության ժամանակ Կրստիչը գլխավորել է բոսնիացի սերբերի բանակի Դրինյան զորակազմը: Նա կալանավորվել է 1998 թվականին: 2001 թվականին Միջազգային տրիբունալը նրան 46 տարվա բանտարկության է դատապարտել մարդկության դեմ հանցագործությունների կատարման, պատերազմի օրենքների և սովորությունների խախտման, ինչպես նաև 1995 թվականի հուլիսին Սրեբրենիցայում տեղի ունեցած իրադարձությունների կապակցությամբ ցեղասպանության մեղադրանքներով, երբ այնտեղ սպանվեց 8 հազար մահմեդական: Դա ցեղասպանության համար առաջին դատավճիռն էր, որը Հաագայի տրիբունալը կայացրել է 1993 թվականին իր գործունեության սկզբից ի վեր:

2004 թվականին Միջազգային տրբունալի Վերաքննիչ պալատը նրա բանտարկության ժամկետը կրճատել է մինչև 35 տարի՝ որոշելով, որ Կրստիչն ուղղակի մասնակցություն չի ունեցել ցեղասպանությանը, այլ «օգնել և նպաստել է» այդ հանցագործությանը, հաղորդել է ԻՏԱՌ-ՏԱՍՍ-ը: