Վրաստանում ուժի մեջ են մտել միգրացիոն նոր կանոնները

Վրաստանում սեպտեմբերի 1-ից ուժի մեջ են մտել միգրացիոն նոր կանոնները. երկրում օտարերկրացիների գտնվելու ժամկետը կես տարվա ընթացքում կրճատվել է մինչև 90 օր, իսկ ավելի երկար բնակության համար կպահանջվի հատուկ այցագիր կամ կեցության վկայական, տեղեկացնում է «Արմենպրես»-ը՝ հղում անելով «Նովոստի Գրուզիային»:

«Սեպտեմբերի 1-ից ուժի մեջ են մտնում նոր կանոնները, որոնք վերաբերում են բոլոր օտարերկրացիներին, այն երկրներին, որոնց հետ Վրաստանն ունի կամ չունի այցագրային ռեժիմ: Մշակված է Վրաստանում գտնվելու միասնական համակարգ»,- հայտարարել է հանրապետության ԱԳ նախարարության հյուպատոսական դեպարտամենտի ղեկավար Գեորգի Տաբատաձեն:

Այն երկրների համար, որոնց վրա տարածվում է այցագրային ռեժիմը, Վրաստանը կտրամադրի 180 օր գործողության ժամկետով բազմակի օգտագործման այցագրեր՝ այդ ժամանակահատվածում ընդհանուր առմամբ 90 օր երկրում գտնվելու իրավունքով:

Անայցագիր ռեժիմի դեպքում, որը Վրաստանում գործում է եվրոպական երկրների, ՆԱՏՕ-ի և ԱՊՀ-ի անդամ երկրների, ինչպես նաև այն երկրների համար, որոնք «Վրաստանի կարևոր գործընկերներն են, և որոնց հետ ձևակերպված է երկկողմ ու բազմակողմ համաձայնագրեր», այդ երկրների քաղաքացիները կկարողանան առանց այցագրերի կես տարվա ընթացքում ընդհանուր առմամբ Վրաստանում գտնվել 90 օր: