«ՌԴ-ն այլևս ռազմավարական գործընկեր չէ Եվրոպայի համար». Մոգերինի

Իտալիայի արտաքին գործերի նախարար Ֆեդերիկա Մոգերինին, որն օգոստոսի 30-ին ընտրվել է ԵՄ-ի դիվանագիտության նոր ղեկավար և պաշտոնը կստանձնի նոյեմբերի 1-ից, այն կարծիքին է, որ Ռուսաստանն այլևս Եվրոպայի ռազմավարական գործընկերը չէ:

Մոգերինին ընդգծել է այն բանի կարևորությունը, որ Ուկրաինան կարող է իր համար ընտրել եվրոպական տարբերակը: «Եվրոպական տարբերակը դրական ընտրություն է: Այն այդպես էլ պետք է ընկալվի: Այս նպատակադրմամբ էինք մենք գործընկերություն կառուցում Մոսկվայի հետ: Իսկ այսօր ՌԴ նախագահ Վլադիմիր Պուտինի կամքով այդ գործընկերությունն այլևս գոյություն չունի: Ռուսաստանը ներկայումս արդեն ռազմավարական գործընկեր չէ, բայց պահպանում է ռազմավարական կարևորությունը մեր աշխարհամասում»,- ասել է Իտալիայի ԱԳ նախարարը Corriere della Sera թերթին տված հարցազրույցում, որը հրապարակվել է սեպտեմբերի 1-ին:

Մոգերինին հայտարարել է, որ Մոսկվան երբեք չի հարգել տարբեր ժամանակներում «Ժնևում, Նորմանդիայում և Բեռլինում» ստանձնած պարտավորությունները և չի կարևորել իրադրությունը փոխելու հնարավորությունը՝ «ազդեցություն գործելով անջատականների վրա մալայզիական ինքնաթիռի անկման կապակցությամբ»: Նաև Կրեմլը, պատասխան միջոցներ ընդունելով Եվրամիության պատժամիջոցների դեմ, գործում է «իր ժողովրդի դեմ»: «Աշխարհագրական այս տարածքի բոլոր երկրների շահերից է բխում համագործակցությունն ու համատեղ աշխատանքը: Բայց դա այն չէ, ինչ այժմ է տեղի ունենում, հավելել է Մոգերինին», հաղորդել է ՌԻԱ Նովոստին: