Մալայզիա են հասցվել Boeing-ի աղետից զոհվածների մարմինները

Ամստերդամից հատուկ չվերթով Կուալա Լումպուր են հասցվել Ուկրաինայի տարածքում Boeing-ի աղետից զոհվածների ինը մարմին, տեղեկացնում է «Արմենպրես»-ը: Մալայզիայի մայրաքաղաքի օդանավակայանում տեղի է ունեցել սգո արարողություն, իսկ այնուհետև ամբողջ երկրում լռության րոպե է հայտարարվել:

Սա արդեն երրորդ ինքնաթիռն է, որը հայրենիք է փոխադրել Malaysia Airlines-ի օդանավի կործանման հետևանքով զոհվածների մնացորդները: Ինչպես ավելի վաղ հայտնել է երկրի տրանսպորտի նախարար Լիոու Տիոնգ Լայը, աղետյալ ինքնաթիռում գտնվող 43 մալայզիացիներից առայժմ ճանաչված են 32-ը, և բոլորն էլ արդեն տեղափոխվել են հայրենիք:

Թագավորության պաշտպանության նախարար Խիշամուդին Հուսեյնն իր հերթին ընդգծել է, որ «աղետի բոլոր զոհերին վերադարձնելը Մալայզիայի կառավարության գերակա խնդիրներից մեկն է»: Դրա համար, նրա խոսքով, անհրաժեշտ է, որ փորձագետները վերադառնան Boeing-ի կործանման վայր:

Malaysia Airlines ընկերության Boeing 777-ը , որը չվերթ էր իրականացնում Ամստերդամ-Կուալա Լումպուր երթուղով, հուլիսի 17-ին աղետի է ենթարկվել Ուկրաինայի Դոնեցկի մարզում: Օդանավի բոլոր ուղևորներն ու անձնակազմի անդամները՝ թվով 298 մարդ, զոհվել են: Նրանց մեծամասնությունը՝ 196 մարդ, Նիդեռլանդների հպատակներ էին, հաղորդել է ԻՏԱՌ-ՏԱՍՍ-ը: