Ուկրաինայում իրադրությունը կարող է զարգանալ «մռայլ սցենարով». ԵԱՀԿ

Եվրոպայի անվտանգության և համագործակցության կազմակերպության գործող նախագահ, Շվեյցարիայի նախագահ Դիդիե Բուրկհալտերը չի բացառում, որ Ուկրաինայի իրադրությունը կարող է զարգանալ «շատ մռայլ սցենարով», տեղեկացնում է «Արմենպրես»-ը: «Մենք ներկա պահին գտնվում ենք վտանգավոր ռազմական դրության մեջ՝ հարավում մարտերի սաստկացմամբ, և, իրոք, կարելի է շատ մռայլ սցենարներ պատկերացնել»,- նշել է նա շվեյցարական PTC հեռուստաալիքին տված հարցազրույցում:

Ուկրաինայի ներկա իրադրությունը, որտեղ չեն դադարում կառավարական ուժերի և աշխարհազորայինների բախումները, Բուրկհալտերը բնութագրել է որպես «զգայուն ժամանակաշրջան»՝ ընդգծելով դիվանագիտական ջանքերի կարևորությունը:

«Մենք՝ որպես ԵԱՀԿ, չկարողացանք իրապես վերջ դնել այդ լարվածությանը, այսինքն՝ ազգային ուկրաինական երկխոսություն սկսել»,- խոստովանել է նա: «Հենց դրա համար էլ շատ կարևոր է ակտիվացնել դիվանագիտական շփումները,- ասել է Բուրկհալտերը:- Մենք պատրաստ ենք հանդես գալ դիվանագիտական նոր նախաձեռնությամբ: Շվեյցարիան միշտ էլ պատրաստ է տրամադրել իր հարթակը»:

Միևնույն ժամանակ նա հայտնել է, որ առայժմ «անհրաժեշտ պայմաններ չկան այնպիսի կարևոր հարցերի շուրջ առարկայական երկխոսություն սկսելու համար, ինչպիսիք են հրադադարը, սահմանների նկատմամբ հսկողությունը, պատանդների ազատումը, զինաթափումը, և ազգային երկխոսության գործարկումը», հաղորդել է ԻՏԱՌ-ՏԱՍՍ-ը: