Վրաստանն Ուկրաինայի պատճառով չի փոխի քաղաքականությունը ՌԴ-ի նկատմամբ. Մարգվելաշվիլի

Վրաստանը չի փոխի իր քաղաքականությունը Ռուսաստանի հետ հարաբերությունների հարցում, որոնք բարդացել են Ուկրաինայի իրադրության պատճառով: Այդ մասին, ինչպես տեղեկացնում է «Արմենպրես»-ը, հանրապետության նախագահ Գեորգի Մարգվելաշվիլին հայտարարել է «Մաեստրո» վրացական հեռուստաընկերությանը տված հարցազրույցում:

«Մեր բարեկամի ու գործընկերոջ՝ Ուկրաինայի դժվարությունների պատճառով այսօր բարդություններ կան Ռուսաստանի հետ հարաբերությունների գործընթացում, բայց դա չի նշանակում, որ Ռուսաստանի հետ հարաբերություններում մեր կողմնորոշումը կփոխվի: Քաղաքականությունն ուղղված է Ռուսաստանի հետ հարաբերություններում լարվածության ապաէսկալացմանը, բայց կան իրավիճակներ, երբ դա դժվար է անել, օրինակ՝ այժմ. սակայն քաղաքականության փոփոխումը չպետք է կախված լինի այսրոպեական խնդիրներից»,-ասել է Մարգվելաշվիլին:

Դրա հետ մեկտեղ նա նշել է, որ Վրաստանի իշխանությունների համար սկզբունքային հարցը տարածքային ամբողջականությունն է: «Մենք ունենք սկզբունքային թեմաներ՝ տարածքային ամբողջականությունն ու ինքնիշխանությունը, և դրական մի ուղերձ առ այն, որ ժողովրդավարական, խաղաղ ու կայուն Վրաստանը վտանգավոր չէ Ռուսաստանի համար: Նա կարող է հետաքրքիր գործընկեր ու հարևան լինել Ռուսաստանի համար: Վրաստանի տարածքային ամբողջականությունն ու կայունությունը սպառնալիք չի ներկայացնում Ռուսաստանի համար»,- հավելել է Մարգվելաշվիլին:

Վրաստանի նախագահի խոսքով՝ Ռուսաստանի հետ հարաբերությունները «չեն լուծվի ոչ մեկ օրում, ոչ էլ մեկ շաբաթում»: «Ռուսաստանի նկատմամբ արտաքին քաղաքական կուրսը հանգում է այն բանին, որ մենք կարողանանք ամրագրել սկզբունքային թեմաները, բայց միաժամանակ այնպես անենք, որ այդ պրոբլեմատիկան չվերածվի լուրջ հակամարտության ու դիմակայության»,- հայտարարել է Մարգվելաշվիլին:

Ընդսմին նա նշել է, որ պաշտոնական Թբիլիսիի հռետորաբանությունը չպետք է ավելի խիստ լինի եվրոպացի ու ամերիկացի գործընկերների հայտարարություններից:

«Վրաստանը միջազգային հանրակցության բաղկացուցիչ մասն է, որն ամրագրում է իր դիրքորոշումը, և Թբիլիսին չպետք է իր գնահատականներում նրանից առաջ անցնի»,- ասել է նախագահը, հաղորդել է «Նովոստի Գրուզիան»: