Պուտինի և Էրդողանի նոր գազային համաձայնագիրը մեծ աղմուկ է բարձրացրել Բուլղարիայում

Սարգիս Ասատրյանը Facebook սոցցանցի իր էջում գրել է.

«Պուտինի և Էրդողանի նոր գազային համաձայնագիրը մեծ աղմուկ է բարձրացրել Բուլղարիայում: Հիշեցնենք, որ «Հարավային հոսք» նախագծի տապալումը պաշտոնական Մոսկվան կապում է Բուլղարիայի ղեկավարության անհետևողականության հետ: Իր հերթին Բուլղարիայի նախագահ Ռոսեն Պլեվնելիևը հայտարարել է, որ «Հարավային հոսք» նախագիծը պետք է դիտարկել ոչ թե Ռուսաստան-Բուլղարիա, այլ Ռուսաստան-ԵՄ ֆորմատի համատեքստում: Վերջինս նշել է, որ ռուսները չեն պատրաստվում հետևել եվրոպական օրենսդրությանը, այդ պատճառով այս նախագիծը հայտվել է փակուղում: Հետաքրքիր է, որ ըստ Պլեվնելիևի, դեռևս պարզ չէ արդյոք Բուլղարիան կշահի այս նախագծից, թե ոչ, քանի որ դեռևս չեն համաձայնեցվել նախագծի իրականացումից հետո կողմերի շահույթները: Համաձայնեցվել են միայն ծախսերը:

Միևնույն ժամանակ Բուլղարիայի էներգետիկայի նախկին նախարար Ռումեն Օվչարովը հայտարարել է, որ սույն նախագծի տապալումը զրկում է իր երկրին տարեկան մոտ 600 միլոն ԱՄՆ դոլար մաքուր եկամուտից: Հետաքրքիր է նրա հայտարարության հենց այս հատվածը. «Ավելի քան 63 միլիարդ խորանարդ մետր գազ, որը պետք է անցներ մեր երկրով, այժմ կանցնի Թուրքիայի տարածքով: Բուլղարիան դուրս է մնում նախագծից որպես էներգակիրների տարանցիկ երկիր: Բոյկո Բորիսովի կառավարությունը պատմության մեջ կհիշվի որպես երեք հսկայական նախագծերի (Բուրգաս-Ալեքսանդրապոլիս նավթամուղ, «Հարավային հոսք» գազամուղ և Բելենեի ատոմային էլետրակայան) գերեզմանափոր: Այս ծրագրերի շնորհիվ Բուլղարիան ոչ միայն դուրս կգար տնտեսական ճգնաժամից, այլև կարող էր դառնալ լիովին ուրիշ երկիր»:

Փաստորեն ռուս-թուրքական նոր համաձայնագրից ամենաշատը տնտեսապես կտուժի հենց Բուլղարիան, որը ստիպված եղավ միանալ հակառուսական պատժամիջոցներին: Արդյունքում շահեց Թուրքիան»: