Հաքերները մեկ միլիարդ դոլար են հափշտակել բանկերի վրա խոշորագույն գրոհի ընթացքում

Carbanak հաքերական գործողության արդյունքում կիբեռհանցագործները շուրջ մեկ միլիարդ դոլար են գողացել ամբողջ աշխարհի 100 ֆինանսական կազմակերպություններից: Այս մասին, ինչպես տեղեկացնում է «Արմենպրես»-ը, ասված է «Կասպերսկու լաբորատորիա» ընկերության հաղորդագրության մեջ:

«Եվրոպոլի» և «Ինտերպոլի» հետ համատեղ անցկացված հետաքննության շնորհիվ ռուսական ընկերությունը պարզել է, որ հաքերական գրոհը տևել է երկու տարի: Մասնագետները կարծում են, որ գործողության թիկունքում կանգնած է միջազգային խմբավորում, որը ներառում է կիբեռհանցագործների Ռուսաստանից, Ուկրաինայից, Եվրոպայի մի շարք երկրներից, ինչպես նաև Չինաստանից:

Փորձագետները նշել են, որ գրոհները դուրս են եկել սկզբունքորեն նոր մակարդակ. գողությունները կատարվել են ոչ թե բանկերի սպասարկյալներից, այլ անմիջականորեն հենց ընկերություններից: Carbanak հրոսակախմբի գրոհը վնաս է հասցրել աշխարհի գրեթե 30 երկրների՝ Ռուսաստանի, ԱՄՆ-ի, Գերմանիայի, Չինաստանի, Ուկրաինայի, Կանադայի, Հոնկոնգի, Տայվանի, Ռումինիայի, Ֆրանսիայի, Իսպանիայի, Նորվեգիայի, Հնդկաստանի, Մեծ Բրիտանիայի, Լեհաստանի, Պակիստանի, Նեպալի, Մարոկոյի, Իսլանդիայի, Իռլանդիայի, Չեխիայի, Շվեյցարիայի, Բրազիլիայի, Բուլղարիայի, Ավստրալիայի և այլ երկրների շուրջ 100 բանկերի, վճարային համակարգերի և այլ ֆինանսական կազմակերպությունների:

Ամենախոշոր հափշտակումները տեղի են ունեցել բանկային ցանցեր ներխուժման ընթացքում. յուրաքանչյուր նման արտագրոհ կիբեռհանցագործներին բերել է մինչև 10 միլիոն դոլար: Առաջին ներթափանցումից մինչև համակարգից փողի դուրսբերումը կիբեռհանցագործներին պահանջվել է երկուսից մինչև չորս ամիս: Փողերի դուրսբերումը կատարվել է առցանց վճարային համակարգերի միջոցով: Խարդախների հաշիվները բացվել են Չինաստանի և Ամերիկայի բանկերում, սակայն փորձագետները չեն բացառում, որ հանցագործները կարող էին գողացված փողերը պահել նաև այլ երկրների բանկերում: