Պուտինը, Մերկելը և Պորոշենկոն քննարկել են Ուկրաինայի իրադրության խաղաղ կարգավորման միջոցառումները

Ռուսաստանի նախագահ Վլադիմիր Պուտինը, Գերմանիայի կանցլեր Անգելա Մերկելը և Ուկրաինայի նախագահ Պյոտր Պորոշենկոն հեռախոսազրույցի ընթացքում քննարկել են Մինսկում հաստատված միջոցառումների փաթեթը` Ուկրաինայի հարավ-արևելքի իրադրության խաղաղ կարգավորման խնդրի շուրջ: Այս մասին հայտնել է ՏԱՍՍ-ը` հղում անելով Կրեմլի մամուլի ծառայությանը:

«Արծարծվել են, մասնավորապես, հրադադարի ռեժիմին վերաբերվող հարցերը, ծանր սպառազինությունների դուրս բերումը, ինչպես նաև Դեբալցեվոյի իրադրությունը», - ասվում է Կրեմլի հաղորդագրության մեջ:

Բացի այդ, ղեկավարները մտքեր փոխանակեցին ԵԱՀԿ առաքելության դերակատարության շուրջ:

Նրանք պայմանավորվել են շարունակել իրենց շփումները տարբեր ձևաչափերով` Մինսկի պայմանավորվածությունների  իրականացմանը օժանդակելու նպատակով:

Նախօրեին ուշ երեկոյան, Անգելա Մերկելը, Պյոտր Պորոշենկոն և Ֆրանսիայի նախագահ Ֆրանսուա Օլանդը հերթական հեռախոսային բանակցություններ են անցկացրել, որոնց ընթացքում անհանգստություն են հայտնել Դեբալցևոյի շրջանում մարտերի շարունակման կապակցությամբ:

Նրանք նաև հանդես են եկել մարտական գործողությունների շրջան ԵԱՀԿ-ի դիտորդների ազատ մուտքն ապահովելու օգտին: