Արևմտյան Աֆրիկայում Էբոլա վիրուսով վարակվածների թիվը գերազանցել է 23 հազարը. ԱՀԿ

Էբոլա վիրուսի հարուցած հիվանդության զոհերի թիվը փետրվարի 13-ից ավելացել է հարյուրով, վարակվածների թվաքանակը՝ 183-ով: Այդ մասին, ինչպես տեղեկացնում է «Արմենպրես»-ը, վկայում են Առողջապահության համաշխարհային կազմակերպության կողմից փետրվարի 16-ին հրապարակված տվյալները:

Ընդամենը համաճարակի սկսվելուց ի վեր Գվինեայում, Լիբերիայում և Սիեռա Լեոնեում մահացել է 9 հազար 353 մարդ, վարակված են 23 հազար 182-ը:

Լիբերիայում զոհերի թիվը հասել է 3 հազար 900-ի, վարակվածներինը՝ 9 հազար 7-ի: Սիեռա Լեոնեում մահացածներն ավելի քիչ են՝ 3 հազար 401, բայց վարակվածներն ավելի շատ են, քան որևէ այլ երկրում՝ 11 հազար 74: Գվինեայում վարակվածների ու մահացածների թիվը կազմում է համապատսխանաբար 3 հազար 101 և 2 հազար 52:

Ինչպես նշում է ՏԱՍՍ-ը, Էբոլա տենդով հիվանդանալու դեպքեր են գրանցվել նաև Մալիում, Նիգերիայում, Սենեգալում, Իսպանիայում, Մեծ Բրիտանիայում և ԱՄՆ-ում: Սակայն այդ երկրների մեծ մասում վարակվածների թիվը չի գերազանցում տասը: Բացառություն է կազմում Նիգերիան, որտեղ Էբոլա վիրուսով վարակվել է 20 մարդ, մահացել են ութը:

Հունվարի վերջին ԱՀԿ-ն հայտնել է, որ Էբոլայով հիվանդացությունը նվազել է վերջին յոթ ամսվա ամենացածր մակարդակ: Սակայն անցած շաբաթ կազմակերպությունում նշել են, որ տարեսկզբից ի վեր առաջին անգամ Արևմտյան Աֆրիկայում նկատվել է հիվանդանալու դեպքերի շաբաթական աճ: Նաև հաղորդվել է, որ կազմակերպությունը լրացուցիչ գործիքների և միջոցների կարիք ունի վտանգավոր հիվանդությունների բռնկմանն արագ հակազդելու համար: