Կանադան գրեթե 100 մլն դոլար կծախսի «Իսլամական պետության» դեմ պայքարելու համար

Իրաքում «Իսլամական պետության» զինյալների դեմ միջազգային գործողությանը մասնակցությունը Կանադայի բյուջեի վրա կնստի 122 մլն կանադական դոլար (98 մլն դոլար): Այդ մասին, ինչպես տեղեկացնում է «Արմենպրես»-ը, հայտնել է երկրի պաշտանության նախարար Ջեյսոն Քեննին:

«Այս շաբաթ ես ազգային խորհրդարանին զեկույց կներկայացնեմ այդ գործողության հետ կապված ծախսերի վերաբերյալ: Առաքելության արժեքը գնահատվում է մոտավորապես 122 մլն դոլար»,- ասված է գերատեսչության ղեկավարի հայտարարության մեջ: Քեննին հավելել է, որ ծախսերը կավելանան, եթե կառավարությունը քվեարկի այդ գործողությանը կանադացի զինծառայողների մասնակցությունը երկարացնելու օգտին:

ՏԱՍՍ-ը հիշեցնում է, որ 2014 թվականի հոկտեմբերին Կանադայի վարչապետ Սթիվեն Հարփերը որոշում է ընդունել ԻՊ-ի դեմ գործող միջազգային կոալիցիային երկրի մասնակցության մասին, որն ավելի ուշ պաշտպանեց նաև երկրի խորհրդարանը:

Կանադայի ռազմական առաքելության ժամկետը սահմանված է վեց ամիս: Քուվեյթում տեղակայված կանադական օդուժի ինքնաթիռներն առաջին մարտական թռիչքները կատարել են 2014 թվականի նոյեմբերի 2-ին: Մերձավոր Արևելք է ժամանել նաև 600 զինծառայող՝ «օժանդակելու օդային առաքելությանը»: Բացի այդ, գործողությանը մասնակցում են 70 զինվորական մասնագետ խորհրդականներ, ովքեր կոնսուլտացիաներ են անցկացնում իրաքցի զորահրամանատարների հետ: