Իրանում ակնկալում են Բելառուսի նախագահի մոտալուտ այցը

Իրանի ԱԳ նախարար Մոհամադ Ջավադ Զարիֆն ակնկալում է բելառուսա-իրանական հարաբերությունների ակտիվացում, ինչին կարող է նպաստել Բելառուսի նախագահ Ալեքսանդր Լուկաշենկոյի այցն Իսլամական Հանրապետություն: Ինչպես տեղեկացնում է «Արմենպրես»-ը, համապատասխան հայտարարությունը նա արել է Բելառուսի իր պաշտոնակից Վլադիմիր Մակեյի հետ փետրվարի 17-ին Մինսկում կայացած հանդիպման ընթացքում:

«Մենք հուսով ենք, որ առաջիկայում տեղի կունենա Բելառուսի նախագահի այցը Իրան, ինչը լավ հիմք կդառնա հարաբերությունների զարգացման համար»,-ասել է Զարիֆը: Նա ընդգծել է, որ երկու երկրների միջև միշտ էլ փոխըմբռնում և գործընկերություն է եղել միջազգային ասպարեզում: Ընդսմին նախարարը հայտնել է, որ ապագայում էլ իրենք կշարունակեն աջակցություն ցուցաբերել միմյանց: Իրանի ԱԳ նախարարը արձանագրել է, որ Թեհրանի և Մինսկի միջև լավ հարաբերություններ են ստեղծվել նաև առևտրատնտեսական բնագավառում, իսկ դրանց ներուժը բնավ չի սպառված չէ:

Իր հերթին, ինչպես նշում է ՏԱՍՍ-ը, Մակեյն ասել է, որ Բելառուս այցի շրջանակներում իրանցի իր պաշտոնակիցը հանդիպում կունենա պետության ղեկավարի, վարչապետի, խորհրդարանի ղեկավարի հետ: «Մենք ակնկալում ենք, որ այցը կնպաստի երկկողմ հարաբերությունների հետագա ինտենսիվացմանը»,-նշել է նախարարը, հավելելով, որ «չի կարելի ապրել միայն անցյալով, անհրաժեշտ է, որ երկրներն առաջ նայեն»: