Իրանը նավթի արտահանումից կախվածությունը կնվազեցնի սև խավիարի վաճառքն ավելացնելու հաշվին

Իրանը մտադիր է նավթի արտահանումից բյուջեի կախվածությունը նվազեցնել սև խավիարի վաճառքն ավելացնելու հաշվին: Ինչպես տեղեկացնում է «Արմենպրես»-ը՝ հղում անելով IRNA գործակալությանը, Իրանի Կասպիական թառափի ուսումնասիրման միջազգային ինստիտուտի ղեկավար Մահմուդ Բահմանին հայտարարել է, որ առաջիկա 20 տարվա համար երկրի զարգացման հեռանկարային պլանի համաձայն՝ խնդիր է դրվում այս ճանապարհով հասնել արտերկրին նավթի մատակարարումներից ստացվող եկամուտների 12,6 տոկոսի փոխարինման:

Ներկայում այս մուտքերը կազմում են արտահանման ողջ հասույթի շուրջ 80 տոկոսը:

Բահմանին IRNA-ին տված հարցազրույցում նշել է, որ Իրանը պլանավորում է թառափի մսի արտադրությունը՝ տարեկան 10 հազարից ավելացնել մինչև 20 հազար տոննա, իսկ սև խավիարինը՝ տարեկան 3-ից մինչև 100 տոննա: Այդ պլաններն արտաքին ազդեցությունների նկատմամբ կայուն տնտեսության ստեղծման և ածխաջրածինների արդյունահանումից կախվածության նվազեցման ազգային քաղաքականության բաղկացուցիչ մասն են կազմում:

Ինչպես նշում է ՏԱՍՍ-ը, Իրանում հատկապես կարևորվում է կասպիական թառափի արհեստական բուծումը և այդ ճյուղի ձեռնարկությունների արդյունավետության բարձրացումը. ներկայիս 8-15 կիլոգրամ սև խավիարի փոխարեն առաջիկա տարիներին պլանավորվում է արտադրական սարքավորումների յուրաքանչյուր միավորից ստանալ 25-45 կիլոգրամ խավիար: