Եգիպտոսը ՄԱԿ-ին կոչ է արել Լիբիայում ռազմական միջամտություն իրկանացնելու բանաձև ընդունել

Եգիպտոսի նախագահ Աբդ ալ Ֆաթթահ աս Սիսին ՄԱԿ-ի անվտանգության խորհրդին կոչ է արել ընդունել բանաձև Լիբիայում միջազգային միջամտություն իրականացնելու համար: «Այլ տարբերակ չկա, ուշադրություն դարձնելով լիբիական ազգի և կառավարության համաձայնությանը և այն բանին, որ նրանք կոչ են անում մեզ միջամտել»,- նշել է նախագահ աս Սիսին:

Ինչպես հաղորդում է «Արմենպրես»-ը՝ վկայակոչելով արաբական լրատվամիջոցները, նա նաև ավելացրել է, որ անհրաժեշտ է ռազմական միջամտություն իրականացնել Լիբիայում ահաբեկիչներին դիմակայելու համար:

Լիբիայում «Իսլամական պետության» դիրքերի ուղղությամբ եգիպտական օդային ուժերի ռմբակոծության հետևանքով տասնյակ ահաբեկիչներ են սպանվել և վիրավորվել: Լիբիայի օդային ուժերի ղեկավար Սակր ալ Ջարուշին հայտարարել է, որ նվազագույնը 7 հարված են ուղղել Դարնայում ահաբեկիչների հենակետերի ուղղությամբ: Նրա խոսքով' մոտ 150 ահաբեկիչ են սպանվել: Սպանված ահաբեկիչների թվում նաև ԻՊ-ի ղեկավարներ կան:

Եգիպտական օդուժը ռազմական գործողություններ է սկսել Լիբիայում ԻՊ-ի դեմ այն բանից հետո, երբ ահաբեկչական կազմակերպությունը համացանցում տարածել էր եգիպտացի 21 քրիստոնյաների սպանության տեսանյութը: