Ուկրաինան և Վրաստանը հարկավոր են միմյանց. Նուլանդ

«Միխեիլ Սահակաշվիլիի արտահանձնման պահանջը վրաց-ուկրաինական երկկողմ հարաբերությունների հարց է, և ես այն չեմ մեկնաբանի»,- Թբիլիսիում կայացած մամուլի ասուլիսում հայտարարել է ԱՄՆ-ի պետքարտուղարի՝ Եվրոպայի և Եվրասիայի գործերով օգնական Վիկտորյա Նուլանդը, տեղեկացնում է «Արմենպրես»-ը՝ հղում անելով «Գրուզիա Online»-ին:

Նա ասել է, թե ինքը ցանկանում է այլ մեկնաբանություն անել վրաց-ուկրաինական հարաբերությունների վերաբերյալ: «Սա շատ կարևոր պահ է ինչպես Ուկրաինայի, այնպես էլ Վրաստանի պատմության մեջ, քանի որ երկու երկրներն էլ փորձում են կանգնել եվրատլանտյան ինտեգրացման ուղու վրա: Մենք կոչ ենք անում Վրաստանի և Ուկրաինայի բոլոր քաղաքացիներին՝ աջակցելու միմյանց այդ գործընթացում, դուք հարկավոր եք միմյանց»,- ասել է Նուլանդը:

Նա հայտնել է, որ Վրաստան այցի շրջանակներում ինքը հանդիպումներ է անցկացրել հանրապետության վարչապետի, նախագահի և ընդդիմության ներկայացուցիչների հետ: Նուլանդն ասել է, թե ինքը Վրաստան է ժամանել, որպեսզի մեկ անգամ ևս հավաստի ԱՄՆ-ի անսասան աջակցությունը Վրաստանի ինքնիշխանությանն ու տարածքային ամբողջականությանը:

Ինչ վերաբերում է այցի ընթացքում անցկացված հանդիպումներին, ապա, նրա խոսքով, դրանցում արծարծվել են վրաց-ամերիկյան հարաբերությունները պաշտպանության և անվտանգության ոլորտում:

Ավելի վաղ Վրաստանի Գլխավոր դատախազությունը դիմել է Ուկրաինայի Գլխավոր դատախազությանը «Միխեիլ Սաակաշվիլիին Վրաստանին արտահանձնելու միջնորդությամբ»: «Այն բանի կապակցությամբ, որ Վրաստանում Միխեիլ Սաակաշվիլիին մեղադրանքներ են առաջադրված և երկրում նրա նկատմամբ ներպետական հետախուզում է հայտարարված, Գլխավոր դատախազությունը դիմել է Ուկրաինայի Գլխավոր դատախազությանը՝ Ուկրաինայում Սաակաշվիլիին ձերբակալելու և նրան Վրաստանին արտահանձնելու միջնորդությամբ»,- նշվում է հաղորդագրության մեջ: «Չնայած արտահանձնման ոլորտում երկու երկրի միջև գոյություն ունեցող համաձայնագրին, ուկրաինական կողմը վրացական կողմի հետ չի համագործակցել Միխեիլ Սաակաշվիլիին արտահանձնելու հարցում և հրաժարվում է իրականացնել այդ արտահանձնումը»,- ընդգծվում է փաստաթղթում:

Փետրվարի 13-ին Ուկրաինայի նախագահ Պյոտր Պորոշենկոն Սաակաշվիլիին նշանակել է Բարեփոխումների խորհրդատվական միջազգային խորհրդի նախագահ: «Մենք բավական երկար էինք մտածում՝ ինչպես ավելի լավ օգտագործենք Միխեիլ Սաակաշվիլիի գիտելիքները, փորձը և բացառիկ նոու-հաուները: Վրաստանում նա փաստորեն կարողացավ բարեփոխել տնտեսական, քաղաքական ու հասարակական կյանքի բոլոր ոլորտները: Մինչև վերջին ժամանակներս Միխեիլը, էստ էության, Ուկրաինայի արտահաստիքային խորհրդատուն էր բարեփոխումների հարցերով»,- ասել է Պորոշենկոն: