Բելառուսն անհրաժեշտ է համարում ներդաշնակեցնել ԵՏՄ-ի երկրների օրենսդրությունները

Բելառուսի Ազգային ժողովի Հանրապետության խորհրդի ղեկավար Միխայիլ Մյասնիկովիչն առաջարկում է համադրել Եվրասիական տնտեսական միության երկրների ազգային օրենսդրությունները, տեղեկացնում է «Արմենպրես»-ը՝ հղում անելով ՌԻԱ Նովոստիին:

«Ըստ իս, կարելի է Միութենական պետության (Ռուսաստան և Բելառուս) բարձրագույն պետխորհրդի առաջիկա նիստում, որը պլանավորված է մարտի 3-ին, համապատասխան հանձնարարություն տալ Եվրասիական տնտեսական հանձնաժողովին, որը գլխավորում է պարոն Վիկտոր Խրիստենկոն՝ յուրատեսակ համադրում կատարել, որպեսզի նախարարները տեսնեն՝ ինչ նոր իրավական փաստաթղթեր պետք է ընդունել կամ դրանք ներդաշնակեցնել»,-ասել է Մյասնիկովիչը փետրվարի 19-ին Մոսկվայում Պետդումայի խոսնակ Սերգեյ Նարիշկինի հետ կայացած հանդիպմանը:

Բելառուսի խորհրդարանի վերին պալատի ղեկավարի խոսքով՝ կարևոր է, որ թե՛ ԵՏՄ-ն, թե՛, ընդհանուր առմամբ, եվրասիական ինտեգրացումը, ապահովվեն ժամանակակից օրենսդրությամբ, որպեսզի երկրները այդ առումով «մերձենան, այլ ոչ թե ընթանան զուգահեռ ուղեգծերով կամ, որ ավելի վատ է, տարբեր ուղղություններով»:

Նարիշկինն իր հերթին նշել է, որ ՌԴ-ի և Բելառուսի միջխորհրդարանական համագործակցության մեջ կան մեծ թվով հարցեր, աշխատանքն ընթանում է թե՛ երկկողմ ձևաչափով, թե՛ ՀԱՊԿ-ի խորհրդարանական վեհաժողովի, ԱՊՀ-ի հարթակում, թե՛ միջազգային խորհրդարանական հարթակներում:

Ռուսաստանը, Բելառուսը և Ղազախստանը 2014 թվականի մայիսին Աստանայում պայմանագիր են ստորագրել ԵՏՄ-ի ստեղծման մասին, որն ուժի մեջ է մտել 2015 թվականի հունվարի 1-ին: Հունվարի 2-ին ԵՏՄ-ին միացել է Հայաստանը, մայիսին սպասվում է Ղրղզստանի միանալը: Ինչպես նշում է ՌԻԱ Նովոստին, ԵՏՄ-ի ստեղծումը նախկին Մաքսային միության մասնակից երկրներին, որոնց միագումար ՀՆԱ-ն կազմում է ԱՊՀ-ի համախառն արդյունքի 85 տոկոսը, հասցնում է ինտեգրացման ավելի բարձր մակարդակի: Այդպիսով, ավարտվում է ԱՊՀ-ի տարածքում խոշորագույն ընդհանուր շուկայի ձևավորումը, որը կվերածվի տնտեսական զարգացման նոր հզոր կենտրոնի: