Ցուցարարները զրուցում են, փոխանակվում են կարծիքներով (ուղիղ միացում)

Բաղրամյան պողոտայում նստացույցը շարունակվում է.

00.50

Այս պահի դրությամբ Բաղրամյան պողոտայում իրավիճակը հանգիստ է: Ցուցարարները զրուցում են, փոխանակվում են կարծիքներով:

23.42

Դավիթ Սանասարյանը մեկնաբանում է Հայրիկյանի և նրա համակիրների պահվածքը: Սանասարյանը կոչ է անում գնալ Բաղրամյան և պայքարել: Նա նշեց, որ այս օրերի ընթացքում այնտեղ շատ լավ երիտասարդություն և մեծահասակներ են հավաքվել, և այլ մասսաները հեռանում են, երբ հայտնվում են պայքարողները, պայքարողները դուրս են գալիս, ծաղրածուները հայտնվում են:

23.10

Էլեկտրաէներգիայի թանկացման դեմ պայքարի մասնակիցները հայտարարություն են ընդունել:

Պատկան մարմիններից ակնկալում ենք վերոնշյալ խնդիրների հստակ պարզաբանում և միաժամանակ հիշեցնում շարժման պահանջները՝

1. Չեղարկել էլեկտրաէներգիայի սակագնի թանկացման հակասոցիալական որոշումը

2. Պատժել խաղաղ հանրահավաքի մասնակիցների և լրագրողների նկատմամբ բռնություն կիրառած ոստիկաններին և դադարեցնել քրեական հետապնդումն ընթացող խաղաղ հավաքի մասնակիցների նկատմամբ

3. Վերանայել սակագինը՝ նվազեցման միտումով

Մանրամասն` այստեղ

22.15

Պարույր Հայրիկյանը չի պատրաստվում հեռանալ Բաղրամյան պողոտայից, թեպետ ցուցարարները ձեռքից խլել են ԵՄ-ի դրոշները և ոտքի տակ առել: Նրանք պահանջում են բողոքի ակցիան չքաղաքականացնել և չկուսակցականացնել: Հայրիկյանը լրագրողների հետ զրույցում ասաց, որ եկել է երիտասարդ ցուցարարներին ճիշտ ուղու վրա դնելու: Նշեց, որ այսպես շարունակվելու դեպքում կունենանք երկրորդ Մայդան: Ցուցարարները Հայրիկյանին անվանեցին դավաճան:

22.05

Ցուցարարները պահանջում են Հայրիկյանից հեռանալ: Նա պարզաբանում է, թե ինչու է բերել ԵՄ-ի դրոշները. «Նրանք դիմել են Եվրոպական դատարան, դա է պատճառը, որ ես եկել եմ Եվրամիության դրոշներով,- ասում է Հայրիկյանը: Ցուցարարները Հայրիկյանի քայլը սադրանք են որակում: Այս պահի դրությամբ Հայրիկյանի թիմակիցները իջեցրել են դրոշները:

22.00

Այս պահին Բաղրամյան պողոտայում լարված իրավիճակ է: Բանն այն է, որ ԱԻՄ նախագահ Պարույր Հայրիկյանն իր թիմով քիչ առաջ Բաղրամյան պողոտա բերեց Եվրամիության դրոշներ: Ժողովուրդը նրան դիմավորեց սուլոցներով ր հորդորեց հեռացնել այն դրոշները և ծածանել միայն հայկական եռագույնը: «Եվրամիությունն այստեղ կապ չունի, եռագո՜ւյն»,- բացականչում են քաղաքացիները:

21.20

Մեկ րոպե լռությամբ Բաղրամյան պողոտայում հարգեցին Սերյոժա Ավետիսյանի հիշատակը, ով դարձավ ռուս զինվորական Վալերի Պերմյակովի ոճրագործության զոհը: Այսօր փոքրիկ Սերյոժան կդառնար 1 տարեկան:

21.15

Ակտիվիստ Գագիկ Եղիզարյանը հատարարեց, որ բողոքի ակցիային իր աջակցությունն է հայտնել հեղինակ կատարող Ռուբեն Հախվերդյանը, ով հուլիսի 4-ին համերգ կունենա Բաղրամյան պողոտայում: Նշենք, որ այսօր էր համերգը նախատեսված:

21.00

Բաղրամյան պողոտայում քիչ առաջ արտակարգ դեպք պատահեց. «Բերդ» պարող երիտասարդներից մեկը ընկավ և վնասեց քիթը: Շտապօգնության բժիշկները ցուցաբերեցին առաջին օգնություն և տեղափոխեցին հիվանդանոց:

19.40

Դեպի Բաղրամյան պողոտա մարդկանց հոսք է նկատվում: Թեպետ անցած օրերի համեմատ մարդկանց թվաքանակն այստեղ քիչ է, սակայն աշխատանքային օրվա ավարտին բազմաթիվ քաղաքացիներ միանում են բողոքի ակցիայի մասնակիցներին:

19.00

Վալերի Օսպիյանը պատասխանելով այն հարցին, թե ջրցանի ու մյուս մեքենաների հեռանալն արդյո՞ք նշանակում է, որ ոստիկանությունը չի պատրաստվում դիմել գործողությունների. «Մենք կարող ենք հասարակական կարգը այստեղ վերականգնել առանց ջրցան մեքենայի։ Պետք չէ ջրցանից վախենալ, դա ևս օրենքով կարգավորվող է, և բոլոր երկրներում էլ կա նման հատուկ միջոց»,- ասաց նա։

17.55

Հունիսի 30-ից Բաղրամյան պողոտայում հացադուլ սկսած Հարություն Հարությունյանը և Հայկ Պարիկյանը դադարեցրեցին հացադուլն ու շտապօգնության մեքենայով տեղափոխվեցին հիվանդանոց։

15.22

Մարդու իրավունքների պաշտպան Կարեն Անդրեասյանը կառավարության նիստից հետո լրագրողների հետ ճեպազրույցում անդրադարձավ տասը օր շարունակ Բաղրամյան պողոտայում տեղի ունեցող ցույցերին և ոստիկանության գործողություններին:

Մանրամասներն`այստեղ:

14.40

Նստացույցը պետք է դադարեցվի, աուդիտից հետո կրկին կարելի է հարցեր բարձրացնել. Հրանուշ Հակոբյան

Մանրամասն`այստեղ:

13.27

Բաղրամյան պողոտայում ցուցարարները բեմադրել են հունիսի 23-ի առավոտյան ոստիկանների գործողությունները՝ ջրցան մեքենաներով ցույցը ցրելը:

«Ոստիկանները» ոչ թե փորձում էին ցրել ցուցարարներին, այլ պարզապես ջրոցի էին խաղում:

13.00

Ռուբեն Հախվերդյանը համերգ կտա Բաղրամյան պողոտայում: Լուրը հաստատել է Տիգրան Խզմալյանը:

10.51

Ոստիկանությունը Բաղրամյան պողոտայից հեռացրեց հատուկ նշանակության տեխնիկան, այդ թվում ջրցան մեքենան:

Հարցին, թե ինչու այդպես վարվեցին, Օսիպյանն արձագաքել է. «Օրվա առանձնահատկությունից ելնելով: Վաղվա առանձնահատկությունից ելնելով չի բացառվում, որ էլի հետ բերվեն: Ջրցանով գեղեցիկ էր նայվում, բայց այսպես էլ է գեղեցիկ: Յուրաքանչյուր գեղեցկություն առանձնահատկություն ունի»:

09.15

Ոստիկանությունը Բաղրամյան պողոտան ազատելը թողնում է ցուցարարների ողջամտության վրա. Բաղրամյան պողոտայում հայտարարեց փոխոստիկանապետ Օսիպյանը, նշելով, որ թեև օրենքով թույլատրված է, բայց ոչինչ չի արվում:

08.05

Լուսաբացը Բաղրամյան պողոտայում. ցուցարարները արթնանում են, սկսվել է տարածքի մաքրությունը:

03.50

Բաղրամյան պողոտայում քաղաքացիները քիչ առաջ նշեցին ցուցարար աղջիկներից մեկի ծննդյան տարեդարձը: