«Զոմբիներ»-ը` Բաղրամյան պողոտայում (ուղիղ միացում, լրացվում է)

23.40

Թեպետ արդեն կեսգիշեր է, սակայն Բաղրամյան պողոտան դեռևս մարդաշատ է: Քաղաքացիներն այսօր ևս կլուսացնեն փողոցում` ի նշան էլեկտրաէներգիայի սակագնի բարձրացման դեմ բողոքի: Քիչ առաջ ավարտվեց «Զոմբիներ» ռոք խմբի համերգը:  Երաժիշտներն այդ կերպ իրենց բողոքն արտահայտեցին էլեկտրաէներգիայի սակագնի թանկացման եւ հունիսի 23-ին ոստիկանության իրականացրած գործողությունների դեմ:

22.50

Ոստիկանությունը տեղեկացնում է, որ Բաղրամյան պողոտայի երկրորդ շենքի մոտից բերման են ենթարկել 23-ամյա Միքայել Դոբրովոլսկուն: Զննությամբ նրա մոտից հայտնաբերվել է կռփազենք' կաստետ:

Մանրամասն` այստեղ

22.10

Վաղը` ժամը 20.00-ին, սիրված երգիչ Ռուբեն Հախվերդյանը համերգ կունենա Բաղրամյան պողոտայում: Էդուարդ Զորիկյանը և Լիլիթ Պիպոյանը ևս իրենց աջակցությունն են հայտնել բողոքի ակցիաներին և նրանք ևս համերգներ կունենան: Այս մասին քիչ առաջ Բաղրամյան պողոտայում հայտարարեց ակցիան համակարգող Դավիթ Սանասարյանը:

Նշենք, որ Ռուբեն Հախվերդյանի համերգը Բաղրամյան պողոտայում հետաձգվել է երգչի առողջական վիճակի վատթարացման պատճառով:

21.10

«Ոչ թալանին» նախաձեռնության անդամները Երևանի կենտրոնում իրազեկման երթ անցկացրին, այնուհետև վերադարձան Բաղրամյան պողոտա: Նրանց այստեղ դիմավորեցին երաժշտությամբ:

20.40

Ընդդեմ էլեկտրաէներգիայի թանկացման բողոքի ակցիայի իրազեկման երթի ժամանակ վատացել է երթի մասնակիցներից մեկի՝ երիտասարդ աղջկա ինքնազգացողությունը: Աղջկան առաջին օգնություն ցույց տվեցին երթի անվտանգությունն ապահովող ՀՀ ոստիկանության աշխատակիցները: Ամիրյան փողոցից, որտեղ ընթանում է երթը, ոստիկանները երիտասարդ աղջկան նստեցրել են հարակից սրճարաններից մեկում, ցույց տվել առաջին անհրաժեշտ օգնություն: Ոստիկանության աշխատակիցները ցանկացել են շտապօգնություն կանչել, սակայն աղջիկը հրաժարվել է՝ պնդելով, որ արդեն լավ է զգում իրեն:

20.00

Այս պահին «Ոչ թալանին» նախաձեռնության անդամները քայլերթ են իրականացնում Հյուսիսային պողոտայում և հանրությանը իրազեկում նախաձեռնության 3 հիմնական պահանջների մասին` կապված էլեկտրաէներգիայի սակագնի բարձրացման հետ:

19.00

Ազատության հրապարակում հավաքված են «Ոչ թալանին» նախաձեռնության անդամները: Նախատեսված է նրանց քայլերթը դեպի Բաղրամյան պողոտա: 

17.00

Արման Ղարիբյանը լուսանկարներ էր փակցրել Բաղրամյան պողոտայում, որոնք վերաբերում էին տրանսպորտին: Դա առաջացրել էր մի քանիսի դժգոհությունը, և նրանք հեռացրին նկարները:

Ակտիվիստները կարծում են, որ միակ պայմանը պետք է լինի էլէներգիայի թանկացման կասեցումը, իսկ Ղարիբյանն իր հերթին պարզաբանեց, որ դա այլ նպատակ չի հետապնդում և միայն ժամանակն ավելի հետաքրքիր դարձնելու նպատակով է արվել:

16.34

Մեկ այլ ակտիվիստ՝ Արամ Մանուկյանը, նշեց, որ Սերժ Սարգսյանի հայտարարությունը իրենց պահանջած 3 կետերի լուծումը չէ:

16.25

«Մեդիա կենտրոնում» «Քաղաքացիական ակտիվիզմ և շարունակվող պայքար Բաղրամյան պողոտայում» թեմայով քննարկման ժամանակ նախաձեռնող խմբի անդամ Արմեն Մկրտչյանն ասաց, որ վերջին 10-13 օրերը նորագույն պատմության մեջ ամենալուսավոր օրերն էին, «որովհետև մենք մեր աչքի առաջ ունեցանք քաղաքացիական և քաղաքական ռեալ սերնդափոխություն»:

14.45

Այսօր՝ հուլիսի 3-ին 19:00-ին, Ազատության հրապարակից «Մենք ենք տերը մեր երկրի» նախաձեռնությունը կազմակերպում է երթ։

Թեման՝ Հոսանքը չպիտի թանկանա։

14:38

«Նման ակցիա իրականացնող մարդիկ պետք է գային և կոորդինացնեին իրենց գործողությունները ներկա պահին նախաձեռնող կողմ հանդես եկողների հետ: Եթե համաձայնեցում չկա, ապա նման միջադեպերն անխուսափելի են: Սա հատվածական շահերի համար չէ, սա հանրային խնդիր է լուծում»,- անդրադառնալով երեկ Բաղրամյան պողոտայում տեղի ունեցած միջադեպին, երբ պողոտա էր բերվել Եվրամիության դրոշներ և որոնք ոտնակոխ եղան, ասաց քաղաքագետ Սարո Սարոյանը:

14:47

Փոքրիկ միջադեպ տեղի ունեցավ հավաքված երիտասարդների միջև: Տղաներն, ամենայն հավանականությամբ, ինչ-որ բան չէին կիսել: Քիչ ուշ ամեն ինչ հարթվեց:

12:10

«Հերիք չի՞ պայքարենք սոցիալական դրամների համար: Ինձ թվում է, որ 15-20 հազար մարդ, ուղիղ կեսը հավաքվում էր, ոչ թե 7 դրամի համար, այլ այն բանի համար, որ ցույց տա, որ ինքը դուրս է գալիս իշխանության դեմ, որ ցույց տա՝ հերիք ա, ի՞նչ եք ուզում մեզնից»,- Բաղրամյան պողոտայում ասում է Շանթ Հարությունյանի որդին՝ Շահեն Հարությունյանը: 

08.00

Լուսաբացը Բաղրամյան պողոտայում. ցուցարարները արթնանում են, սկսվել է տարածքի մաքրությունը: