Անպայման կվերադառամ և կդառնամ միայն ավելի ուժեղ. Օզբիլիս

Հայաստանի ազգային հավաքականի ֆուտբոլիստ Արաս Օզբիլիսը СЭ-ին տված ծավալուն հարցազրույցում անդրադարձել է «Սպարտակի» նախկին գլխավոր մարզչի՝ Յակինի մասին տված սկանդալային հարցազրույցին, իր առողջությանը, անհաջող ստացված անցյալ մրցաշրջանին և նշել է.

«Հասկանում եմ՝ պատմությունը տհաճ ստացվեց: Գիտակցում եմ, որ դա այնքան էլ լավ չէր իմ կողմից: Իսկ եթե նույնիսկ ցավում եմ, միևնույնն է, ոչինչ չեմ կարող փոխել: Դրանից հետո Յակինի հետ շփվել եմ: Ես ասացի նրան, որ դա գեղեցիկ չէր իմ կողմից, և ավելի լավ կլիներ՝ այդ ամենը նրան անձամբ ասեի: Եթե ժամանակը հետ տալու հրարավորություն լիներ, միգուցե ես նման հարցազրույց կրկին տայի, սակայն պարտադիր կխորհրդակցեի մամուլի ծառայության հետ: Անձամբ Յակինին հրաժեշտ տալիս ասացի՝ շնորհակալություն համատեղ աշխատանքի համար: Նա նույնպես շնորհակալություն հայտնեց, հաջողություն մաղթեց և տեսնվելու հույս հայտնեց:

Ամեն ինչ կարգին է, օրեցօր ինձ ավելի լավ եմ զգում, ուժերս եմ հավաքում: Ծնկիս վնասվածքն արդեն չի անհանգստացնում, ոչ մի ցավ չկա: Անցյալ մրցաշրջանը ոչ թե կանվանեմ վատագույնը, այլ ծանր: Սակայն ես աջակցություն էի ստանում, ընտանիքիցս, թիմից: Ծնկի նման վնասվածքից ապաքինվելն ավելի բարդ է, քան մարզվելն ու խաղալը: Ինչքան ֆուտբոլիստներ են վերադարձել մեկ-երկու տարի անց և նախկին մակադակին հասել: Անպայման ես էլ կվերադառնամ և կդառնամ միայն ավելի ուժեղ և ավելի լավ: Ֆուտբոլը շատ եմ կարոտել»:

Այն հարցին, թե չի՞ վախենում արդյոք ֆուտբոլիստն անցյալ մրցաշրջանը հիանալի անցկացրած Պրոմեսի հետ մրցակցությունից, Օզբիլիսը նշել է.

«Կհամաձայնեմ, որ նա հիանալի էր: Ոչ մի խնդիր այստեղ չեմ տեսնում: Մենք միասին հիանալի կարող ենք խաղալ»: