Ադրբեջանն անհանգստացած է Կասպից ծովում Իրանի էներգետիկ հետաքրքրության աճով

Իրանը, որը հավակնում է Կասպից ծովի հայելու 20 տոկոսին, էներգակիրների թանկարժեք հետազոտություններ է սկսել ծովի հարավային հատվածում: Կասպից ծովում Իրանի էներգետիկ մրցակցության սաստկացումը խիստ անհանգստացրել է Ադրբեջանին:

Ինչպես հաղորդում է «Արմենպրես»-ը' վկայակոչելով ադրբեջանական ԶԼՄ-ները, Իրանի նավթի նախարար Բիժան Նամդար Զանգանեն վերջերս Բեռլինում անցկացված էներգետիկ անվտանգության գագաթաժողովում հայտարարել է, որ Իրանը ծրագրում է երկրի տնտեսության նավթագազային հատվածում մինչեւ 2022 թվականը 180 մլրդ դոլարի ֆինանսական միջոցներ ներդնել: Նրա խոսքով՝ Իրանը միշտ եղել է էներգառեսուրսների հուսալի մատակարարող, եւ մտադիր է վերականգնել իր դիրքերը էներգետիկ շուկայում:

Իրանական North Drilling Co. ընկերության գլխավոր տնօրեն Հեյադոլլահ Խադեմին օրերս հայտարարել է, որ իր ղեկավարած հորատող ընկերությունը պատրաստվում է նոր հորատանցքեր հորատել Կասպից ծովում:

«Ներկայում «Ամիր Քաբիր» հորատող պլատֆորմում վերանորոգման աշխատանքներ են կատարվում, որից հետո ընկերությունը Իրանի պետական նավթային ընկերության պատվերով Կասպից ծովում նոր գազանավթային հորատանցքեր կհորատի: Մեզ արդեն հաջողվել է այնտեղ նավթ եւ գազ գտնել:

Ադրբեջանական ԶԼՄ-ներն այդ առնչությամբ, մասնավորապես, նշում են. «Ինչպես երեւում է' 180 մլրդ դոլարի զգալի մասը ուղղվելու է Իրանի կողմից կասպյան ավազանի իրացմանը: Իսկ դա արդեն ազդանշան է ադրբեջանական նավթագործների համար: Կասպյան նավթագազային շուկայում իրանական ներկայությունը մեծացնելու է այդտեղ մրցակցությունը եւ ավելի է սրելու Կասպից ծովի կարգավիճակի մասին հարցը: Եթե ածխաջրածինների պաշարներն իրանական հատվածում բավարար լինեն, ապա երեք մերձկասպայան երկրների' Ադրբեջանի, Իրանի եւ Թուրքմենստանի միջեւ վեճերը կարող են այնպիսի թափ ստանալ, ինչի հետ Բաքուն երբեք չի բախվել: Հետեւաբար, անհրաժշետ է պատրաստվել ավելի մասշտաբային մրցակցության, դրա նոր ձեւերին եւ մեթոդներին»: