Կոմիտասի թանգարան-ինստիտուտում անցկացրած մեկ ժամն Ազնավուրին շատ բան է սովորեցրել

Ֆրանսահայ լեգենդար երգիչ Շառլ Ազնավուրը հոկտեմեբրի 10-ին այցելեց Կոմիտասի թանգարան-ինստիտուտ: Մշակութային օջախին և ցուցանմուշներին ծանոթանալուց հետո լեգենդար երգիչը գրառում կատարեց թանգարան-ինստիտուտի հուշամատյանում. «Մենք երբեք լիովին չենք ճանաչում այն արվեստի գործերը, որոնցով հիանում ենք: Մեկ ժամ այս թանգարանում լինելը մեզ շատ բան սովորեցրեց և հարստացրեց մեզ»:

«Արմենպրես»-ի հետ զրույցում թանգարան-ինստիտուտից ստացած տպավորությունները փոխանցելով' աշխարհահռչակ երգիչն ընդգծեց. «Շատ գեղեցիկ թանգարան է: Մտածեցի, թե ինչ ենքն մենք այստեղ' այս թանգարանում անելու: Տեղն ինձ շատ մեծ թվաց, բայց հիմա կարծում եմ, որ շատ փոքր է»,- :

Ազնավուրը խոստովանեց, որ Կոմիտասն իր ստեղծագործական կյանքում դեր չի ունեցել: «Շատ բան ունեի սովորելու այն ամենից, ինչ տանը լսում էի, մանավանդ' Սայաթ-Նովա: Ես ճանաչել եմ Կոմիտասի ստեղծագործությունը, բայց նա ազդեցություն չի ունեցել: Կարող եմ ստել, բայց սուտ չեմ խոսում»,- ընդգծեց նա:

Կոմիտասի քանդակները տեսնելով' Ազնավուրը նկատեց. «Երբ Հայաստանում առաջին համերգն ունեցա, ետնաբեմում ինձ մի քանդակագործ մոտեցավ. իմ քանդակն է արել: Պետք է Հայաստան ուղարկեմ այն»:

Թանգարան-ինստիտուտի տնօրեն Նիկոլայ Կոստանդյանը Կոմիտասի ութ սկավառակ ներառող ալբոմ նվիրեց Շառլ Ազնավուրին:

«Ինչպես յուրաքանչյուր հայի, այնպես էլ Կոմիտասի անունը կրող այս հաստատության համար պատվաբեր է Շառլ Ազնավուրի ներկայությունը: Ուրախ ենք, որ եկել է և իր այցելությամբ պատվել մեր թանգարան-ինստիտուտը»,- «Արմենպրես»-ի հետ զրույցում նշեց Նիկոլայ Կոստանդյանը: