Ա՛յ քեզ փեսա…

Այն, որ հովանավորչությունն ու կոռուպցիան Հայաստանում վաղուց գտնվում են անվերջ փթթման գործընթացում, հայտնի ճշմարտություն է: Ընդ որում՝ այս մասին շատ լավ տեղյակ են ինչպես երկրի ազգաբնակչության ամենալայն շրջանակները, այնպես էլ՝ համաշխարհային հանրությունը. կոռուպցիայի մակարդակի մասին աշխարհում անցկացրած վերջին ուսումնասիրություններն այս ամենի վառ ապացույցն են:

Բայց համաձայնե՛ք, որ մի բան է վիճակագրական՝ մի տեսակ վերացական տվյալներ ընթերցելը, և բոլորովին այլ բան, երբ կոռուպցիոն դրսևորումը տեղի է ունենում անմիջապես բոլորի աչքի առաջ, բացահայտ: Ահավասիկ ձեր ուշադրությանն ենք ներկայացնում, ըստ մեզ, ասվածի մի վառ մասնավոր օրինակ: Մամուլում համառորեն լուրեր են շրջանառվում այն մասին, որ հանրահայտ Վահրամ Բաղդասարյանի՝ ԱԺ ՀՀԿ խմբակցության ղեկավարի փեսայի եղբորը՝ Կարեն Սարգսյանին, բոլորովին վերջերս «քյալամ» պաշտոնի են նշանակել. շնորհիվ ազդեցիկ խնամու՝ այս անձը, գրեթե մեկ գիշերվա ընթացքում, չգիտես՝ ինչ հչաշքով, դարձել է Արաբկիրի հարկային տեսչության պետի տեղակալ: Հավելյալ տեղեկատվության կարգով նշենք, որ Կարեն Սարգսյանն Աջափնյակի թաղապետ Արտավազդ Սարգսյանի՝ Վահրամ Բաղդասարյանի փեսայի եղբայրն է: Այս պատմության հետաքրքրական կողմերից մեկն էլ այն է, որ պարզվում է՝ չնայած Սարգսյանը հարկայինում աշխատում էր մոտ 10 տարի, սակայն, «տարօրինակ զուգադիպությամբ», նրա աստեղային ժամը հասավ ճիշտ այն պահին, երբ նա, շնորհիվ իր եղբոր, վերածվեց Բաղդասարյանի խնամու: Ի դեպ, թաղապետի եղբայրը փոխարինել է Արթուր Գրիգորյանին, ով ավելի քան 15 տարի է՝ պետի տեղակալ էր աշխատում, սակայն այժմ ստիպված է լինելու բավարարվել ընդամենը շարքային տեսուչի աշխատանքով:

Դե հիմա ասե՛ք, որ միջազգային զանազան վարկանշային աղյուսակները՝ առնչվող մեր երկրում կոռուպցիայի մակարդակի հետ, կեղծիք են ու շինծու տվյալներ են ներկայացնում հանրությանը: Տեսնեմ՝ լեզուներդ կպտտվի՞: Բարեկամնե՛ր, կարո՞ղ եք ասել՝ էլ կոռուպցիան ու հովանավորչությունն ինչպե՞ս է լինում: Հետո էլ զօրուգիշեր ոմանք դատապարտում են միջնադարյան բարքերին բնորոշ որոշ երևույթներ՝ հովանավորչությունը, դիրքի, պաշտոնի չարաշահումը, այդ ամենը ժառանգաբար փոխանցելու ավանդույթները…

Իհարկե, համարել, թե այս երկրում բացառապես Վահրամ Բաղդասարյանն է, ով սեփական հարազատներին ցանկանում է «մի կտոր հացի տեր» անել, անարդար կլիներ. բոլորն էլ, ում կյանքում գեթ մեկ անգամ բախտ է վիճակվում հասնել որոշակի դիրքերի, նման անհաջող միտումներ դրսևորւմ են՝ այդպիսով է՛լ ավելի խորացնելով բոլոր այն բացասական երևույթները, որոնցից մենք երկար տասնամյակներ է, ինչ չենք կարողանում ազատվել. նրանք կոռումպացնում են ողջ պետական համակարգը՝ ով ինչպես կարող է, ով ինչպես «բաշարում» է:

Դավիթ Բաբանով