Հրաձիգները շարունակում են մրցելույթները (լուսանկարներ)

Հունգարիայի Գիոր քաղաքում շարունակվում է հրաձգության Եվրոպայի առաջնությունը: Հայաստանի ներկայացուցիչները արդեն իրենց հաշվին վազող թիրախ երիտասարդ տղաների պայքարում գրանցեցել են թիմային բրոնզե մեդալ: Ինչպես նաև օդամղիչ ատրճանակ երիտասարդ տղաների վարժությունում Զավեն Իգիթյանը գրավել է 4-րդ տեղը:

Երեկ օդամղիչ ատրճանակ տղամարդկանց պայքարում 84 մրցակցից Նորայր Առաքելյանը, խոցելով 575 միավոր, գրավել է 16-րդ տեղը: Ինչպես նաև, օդամղիչ հրացան կանանց վարժությունում 96 մրցակցուհուց Մարիամ Միքայելյանը գրավել է 79-րդ տեղը' խոցելով 405,9 միավոր և Իրինա Լաուերը գրավել է 90-րդ տեղը' խոցելով 399,6 միավոր: Վերոնշյալ վարժություններում խաղարկվում էին Ռիո-2016-ի 3-ական օլիմպիական ուղեգրեր: Հայ մարզիկներին չի հաջողվել նվաճել ուղեգրեր:

Ուղեգրեր կխաղարկվեն նաև այսօր տեղի ունենալիք օդամղիչ ատրճանակ և հրացան մրցաձևերում: Հայաստանի ժամանակով ժամը 12:30-ին կմրցեն օդամղիչ ատրճանակ կանանց վարժությունում Էլմիրա Կարապետյանը, վազող թիրախ' խառը վազք երիտասարդ տղաների վարժությունում Ռազմիկ Մինասյանը, Շանթ Սարգսյանը և Հովհաննես Խաչատրյանը, նույն վարժության երիտասարդ աղջիկների պայքարում կմրցի Լիլիթ Մկրտչյանը: Այնուհետև 14:15-ին օդամղիչ հրացան տղամարդկանց վարժությունում կմրցեն Սուրեն Բերյանը, Հրաչիկ Բաբայանը և Քրիստիան Լաուերը: Հրացան և ատրճանակ ձևերից մարզիկները կմրցեն նաև «խառը թիմային» վարժությունում: Այսքանով հայ հրաձիգները կավարտեն մրցելույթները Եվրոպայի առաջնությունում:

Հայաստանի հրաձգության հավաքական թիմը հայրենիք կվերադառնա փետրվարի 28-ի լույս 29-ի գիշեր ժամը 01:30-ին: «Զվարթնոց» օդանավակայանում միասին դիմավորենք հայ հրաձիգներին:

Հ. Գ. Հունգարիայի Գիոր քաղաքում փետրվարի 22-28-ը տեղ է ունենում Եվրոպայի առաջնություն 10մ հեռավորությունից՝ հրացան, ատրճանակ, վազող թիրախ զենքաձևերից, որին մասնակցում է 47 երկրի 588 մարզիկ: Նախորդ տարվա համեմատ աճել է մասնակից երկրների ու մարզիկների քանակը: Եվրոպայի առաջնությանը խաղարկվում է Ռիո-2016-ի 12 օլիմպիական վարկանիշ: Վարկանշային են հրացան և ատրճանակ մեծահասակների վարժությունները' յուրաքանչյուր ձևից խաղարկվում է 3-ական վարկանիշ' կանանց և տղամարդկանց համար:

Եվրոպայի առաջնությանը Հայաստանից մասնացում է 14 մարզիկ' գլխավոր մարզիչ Սեյրան Նիկողոսյանի և ավագ մարզիչ Անդրանիկ Այվազյանի մարզչական ղեկավարությամբ: Հայաստանի հանրապետությունը Եվրոպայի առաջնությանը նման մեծ պավիրակությամբ առաջին անգամ է մասնակցում: Հայաստանի հավաքականը կազմված է Երևանի հրաձգության մանկապատանեկան մարզադպրոցի, Հրաձգության հանրապետական մարզադպրոցի և Գյումրու քաղաքապետարանի հրաձգության մարզադպրոցի սաներից:

Մրցաշարի արդյունքներին կարող եք օնլայն հետևել, նկարներ և տեսանյութեր տեսնել results.sius.com, esc-shooting.org և issf-sports.org կայքերում: