Մեդվեդևը՝ Հայաստանի վարչապե՞տ

Ինչպես գիտենք, մի քանի օր առաջ' կառավարության նիստի ժամանակ, միջազգային տնտեսական ինտեգրման ու բարեփոխումների նախարար Վաչե Գաբրիելյանը հանդես էր եկել հայտարարությամբ, ուր խոսել էր այն մասին, որ ՀՀ կառավարությունը ցանկանում է ֆիզիկական անձանց կողմից մեքենաների ներմուծումն ազատել ավելացրած արժեքի հարկից, մի հարկատեսակ, որի պատճառով ոչ միայն այս,այլև շատ այլ ոլորտներ ներկայումց Հայաստանում չեն կարողանում նորմալ կենսագործել: Հիշեցնենք,որ եթե գործող օրենսդրությամբ ֆիզիկական անձինք ԱԱՀ-ից պետք է ազատվեին միայն 2017 թ. հունվարի 1-ից, ապա այժմ առաջարկվում էր էքստեռն կարգով արագացնել որոշման ընդունումը.ընդունեցին: Հիմա այլևս ավտոմեքենաներ ներկրող անձինք,որոնք ԵՏՄ երկրների հետ են աշխատում, այլևս ստիպված չեն լինի հավելյալ գումարներ վճարել մաքսատանը, ինչն էլ, բնականաբար, դրականորեն կազդի ՀՀ այդ երկրներից ներմուծվող ճանապարհատրանսպորտային փոխադրամիջոցների գների վրա. մեքենա գնելը մեր քաղաքացիների համար կդառնա ավելի մատչելի. մեքենաների արժեքը էապես կնվազի, պահանջարկն էլ կմեծանա, իսկ վրաստանյան ավտոշուկան այլևս կդադարի Հայաստանի համար ներկրման միակ կենտրոնը լինելուց: Հրաշալի է, այնպես չէ՞: Սրանից էլ լավ նորությո՞ւն՝ տղամարդկանցս համար…

Պարզվում է, սակայն, որ հայրենի կառավարության կողմից համապատասխան բարի կամքի դրսևորումն ամենևին էլ ինքնաբուխ չի եղել: Ոլորտի մի շարք գիտակներ, քաջատեղյակ լինելով մեզանում իրերի իսկությանը, պնդում են, որ Հովիկ Աբրահամյանի կողմից գլխավորած կառավարության այս քայլը մեծապես պայմանավորված է եղել հետնաբեմային որոշ գործընթացներով, ու Աբրահամյանին և իր ենթակա նախարար Վաչե Գաբրիելյանին Կրեմլից հստակորեն հասկացրել են, որ ժամանակն է բացել Հայաստանի դռները աշխարհի և, առաջին հերթին, ԵՏՄ երկրների առաջ' առավել համապարփակ ու արդյունավետ համագործակցության համար: Փաստացի ստացվում է, որ մերոնց Մոսկվայից պարտադրել են անել բարեփոխումներ սեփական հայրենիքում: Պատկերացրի՞ք պահի անհեթեթության ողջ աստիճանը: Օտարը մեզ ստիպում է, որ մենք շենացնենք մեր իսկ երկիրը: Պարոնա՛յք, մ՞իթե պարոն Մեդվեդևն է մեր երկրի վարչապետը… Չգիտեմ՝ աշխարհում էլի կա՞ նման բան… Հետո էլ ոմանք սեփական PR ակցիան էին շտապում կազմակերպել՝ ձևացնելով, թե այնքան մտահոգ են մարդկանց համար, որ շտապում են օր առաջ թեթևացնել հայրենակիցների հոգսերը: Իսկ թե սույն հարցում Մոսկվայի շահագրգռվածությունը որն է, կարծում ենք, հասկանում եք բոլորդ. Ռուսաստանը շահագրգռված է աշխարհում, բայց մանավանդ սեփական ազդեցության տակ գտնվող ԵՏՄ անդամ երկրներում առաջ մղել իր ավտոմեքենաշինական արտադրանքի սպառման տեմպերը՝ շեշտադրում կատարելով, նախևառաջ, գնային ճիշտ քաղաքականության վրա: Համաձայնե՛ք, որ այստեղ ՀՀ քաղաքացիներիս ու Ռուսաստանի շահերը համընկնում են ինչպես երբևէ. ոչ ոք դեմ չէ միևնույն ապրանքի համար ավելի էժան վճարելուն:

Թե ինչից ելնելով էին մեր հայրենի պատասխանատուները մտադիր ձգձգելու այս օրենքի կիրառումը, գոնե մեզ համար, մնում է այդպես էլ անհասկանալի, բայց որ այս որոշման համար մենք ո՛չ Հովիկ Աբրահամյանին, ո՛չ էլ, առավել ևս, Վաչե Գաբրիելյանին «շնորհակալություն» ասելու հիմքեր չունենք, կարծում եմ՝ արդեն համոզվեցիք:

Դավիթ Բաբանով