Խմբագրական. Այս անգամ էլ կլռե՞նք

Թուրքիայի վարչապետ Ահմեդ Դավութօղլուն իր վերջին հայտարարություններից մեկում ասել է. «Քրդերը հայ ավազակախմբերի պես Ռուսաստանի հետ համագործակցում են, գնում են Մոսկվայում ներկայացուցչություն են բացում»:

Այսպիսով, հերթական անգամ թուրքերը հայերին որակեցին որպես «ավազակներ», սա արդեն թուրքերի համար սովորույթ է դառնում: Եթե հիշում եք՝ 2014-ին էլ Վարդան Օսկանյանի հրավերով Հայաստան եկած՝ ղեասպան Ջեմալ Փաշայի թոռն հենց Երևանի կենտրոնում իր ելույթի մեջ «Նեմեսիսի» հայ վրիժառուներին անվանեց ավազակներ և ըստ արժանվույն պատասխան չստացավ: Հիմա արդեն իրենց վարչապետն է շարունակում նույն մոտիվները, և տեսնենք այս դեպքում ըստ արժանվույն պատասխան կստանա՞ մեր իշխանության ներկայացուցիչների կողմից, թե՞ վերջերս Թուրքիայի օդուժի կողմից մեր օդային սահմանը խախտելու դեպքի նման՝ մերոնք կգերադասեն լռել, որպեսզի չսրվի իրավիճակը:

Իսկ իրավիճակը ամեն դեպքում կարող է սրվել՝ անկախ նրանից, թե մեր կողմը կլռի կամ ոչ: Բանն այն է, որ Ռուսաստանի և ԱՄՆ-ի պայմանավորվածությունը՝ Սիրիայում հրադադար հաստատելու վերաբերյալ, բնավ ձեռնտու չէ Թուրքիային, որն անմիջականորեն հովանավորում էր Սիրիայում գործող ահաբեկչական խմբերին: Ու պատահական չէ, որ ռուս-ամերիկյան-սիրիական այս համաձայնությանը չեն միացել «Իսլամական պետություն» և «Ալ-Նուսրա» ահաբեկչական խմբավորումները, մանավանդ որ այս երկուսի շահերն ակնհայտորեն համընկնում են Թուրքիայի շահերի հետ: Պատահական չէ նաև, որ Ռուսաստանը Հայաստանում նոր ռազմաբազան համալրել է նոր տեխնիկայով, ուժեղացրել, որովհետև ակնկալում է լարվածության ուժեղացում Թուրքիայի կողմից: Թուրքիան ակնհայտ ջղաձգումների մեջ է, որովհետև Սիրիայի հետ կապված իրենց ծրագրերը փաստացի տապալվեցին, քրդերի ու ռուսների համագործակցությունն ավելի քան բացահայտ է, մտահոգիչ է նրանց համար նաև Հայաստանի բազան ուժեղացնելը ռուսների կողմից: Այս ամենը, իհարկե, կարող են բերել նմանատիպ ագրեսիվ վերաբերմունքի, և այդ վերաբերմունքն արդեն սկսում է արտահայտվել նույնիսկ պաշտոնյաների հայտարարություններում: Հայկական կողմը, կարծում եմ, պետք է զգոն լինի, բայց միաժամանակ նաև թույլ չտա, որ հարևան երկրի իշխանության ոչ ադեկվատ ներկայացուցիչներն իրենց համար սովորություն դարձնեն հայերի հասցեին հրապարակային վիրավորանքներ հնչեցնելը և ամեն անգամ մնան անպատասխան:

Կարեն Վարդանյան