Մարտի 1-ը՝ մենաշնորհ

2008-ին ՀԱԿ-ի վերածված՝ նախկին իշխանությունները Մարտի 1-ը դարձրին իրենց հիմնական խաղաքարտը, սակայն հաղթաթղթի վերածել այն չկարողացան, որովհետև ՀԱԿ-ն անմիջապես բռնեց ինքն իրեն սպառելու ճանապարհը՝ ձեռքի հետ նաև արժեզրկելով Հայաստանի ամբողջ ընդդիմադիր դաշտը: Սպառվելու այդ ճանապարհին շատերը դուրս եկան ՀԱԿ-ից, առանձնացան, այդ թվում՝ Նիկոլ Փաշինյանը, ում դերակատարությունը Մարտի 1-ի դեպքերի ժամանակ բոլորս էլ հիշում ենք: Եվ տրամաբանական է, որ պետք է որ առաջնահերթ լսվեն 2008-ի դեպքերի առանցքային դերակատարների ելույթները, սակայն պարզվում է՝ դա այդքան էլ այդպես չէ:

Պարզվում է, որ նախկինում իշխանական դիրքերում եղած և մենաշնորհների սովոր մարդիկ որոշել են մենաշնորհ դարձնել նաև Մարտի 1-ը և իրենք որոշել, թե ովքեր պիտի ելույթ ունենան այդ օրն անցկացվելիք միջոցառմանը: Փաստորեն, ՀԱԿ-ն ինքն իրենով արդեն որոշել է, որ վաղը ելույթ են ունենալու միայն Արամ Մանուկյանը և «Նոր Հայաստանից» Գարեգին Չուքասզյանը: Չուքասզյանին էլ երևի ելույթի հնարավորություն տվել են, որովհետև վերջինս հայտնի «քոչարյանական» է և Մարտի 1-ի հարցում ՀԱԿ-ին «կոնկուրենտ» չի հանդիսանում, վտանգ չի ներկայացնում ՀԱԿ-ի համար:

Պարզապես մի հարցում ՀԱԿ-ի հաշվարկներն ակնհայտորեն սխալ են. ես ենթադրում եմ, որ նրանք մտածել են, թե Նիկոլ Փաշինյանը ելույթ ունենալով՝ կարող է մթագնել իրենց «փառքը», բայց մի բան են մոռանում, որ իրենց փառք որպես այդպիսին արդեն չի էլ մնացել, հետևաբար՝ այդ ելույթն իրենց ոչնչով չէր վնասի, մանավանդ որ Մարտի 1-ը ներկա պահին ՀԱԿ-ի համար արդեն նույնիսկ խաղաքարտ էլ չէ, ուղղակի մենաշնորհներ պահելու սովորությունն է, որ նրանց հանգիստ չի թողնում:

Կարեն Վարդանյան