Չգիտեի՞ք, որ ազգի նվիրյալ ա. դե՛ իմացեք

Օրերս ինտերնետային տեղական ռեսուրսներից մեկը հանդես էր եկել հրապարակմամբ, որում պնդում էր, թե Սամվել Ալեքսանյանի կեղծած օղիների եթերային յուղերը մի քանի անգամ գերազանցում են օրիգինալին: Սամվել Ալեքսանյանն էլ, տեղեկանալով, որ ինչ-որ լրատվամիջոց զբաղված է իր արդար անձը «շառը տալով», որոշում է կայացնում հրավիրել լրագրողին սպիրտի արտադրման սեփական գործարան՝ ապացուցելու, որ իր արտադրանքը որակապես մրցունակ է ու չի զիջում այն օրիգինալ օղիներին, որոնց կեղծմամբ էլ հենց զբաղվում է ինքը: Ընթացքում բռնվելով մտերմիկ զրույցի կայքի լրագրողի հետ՝ իր խոսքում Ալեքսանյանը, միգուցե միանգամայն պատահաբար, մի յուրօրինակ կոչով է հանդես գալիս՝ ասելով. «Որ ասում եք՝ օղին կեղծում եք, բան չեմ ասում, բայց որակին մի՛ կպեք»:

Դե հիմա ասե՛ք, ուրիշ էլ որտե՞ղ կարելի կլինի տեսնել ու լսել նման բան, աշխարհի ո՞ր ծայրում է գտնվում երկրորդ նմանատիպ երկիրը, ուր նման հայտարարություն անողին ոչ թե պատասխանատվության կենթարկեն, այլ կբավարարվեն ընդամենը հոդվածներ հրապարակելով: Կա՞ մոլորակում ևս մեկ նման երկիր, այո՞, ուրեմն՝ շնորհավորում եմ բոլորիդ. մենք միայնակ չենք մեր դժբախտության մեջ:

Եթե հետևել եք լրատվամիջոցների հրապարակումներին, ապա տեղյակ կլինեք այն մասին, որ մամուլում որոշ ժամանակ առաջ մեծ արձագանք էր ստացել այն դատավարությունը, ուր քննվում էր «Ա և Գ» ՍՊԸ-ի կողմից ուկրաինական արտադրության օղիները կեղծելու վերաբերյալ գործը, ու չնայած մեղադրող կողմին հաջողվել էր ապացուցել փաստը, որ Սամվել Ալեքսանյանի ընկերությունը կեղծում է ուկրաինական արտադրության օղիները, սակայն դա չխանգարեց, որ Ալեքսանյանը շարունակի իր ապօրինի գործունեությունն ու «ապաշքյարա» հիմարացնի ողջ երկրին: Ավելին՝ «Խլեբնի դար» 7 «Մեդոֆ» տեսակի օղիների փորձաքննության արդյունքում պարզվել էր, որ կեղծած օղիները որակապես զիջում են ուկրաինականին:

Իհարկե, սեփական հանդուգն վարքագիծն արդարացնելու համար Ալեքսանյանը փորձում է շահարկել իր կողմից աշխատատեղերի ստեղծման պարագան՝ հռետորական հարց հնչեցնելով, թե եթե փակի իր գործարանն, ու դրա արդյունքում մարդիկ մնան անգործ, որքանո՞վ դա կարող է բխել երկրի կամ հասարակության շահերից, ո՞վ է փոխհատուցելու իրենց աշխատանքը կորցրած քաղաքացիների վնասները: Հիմա հասկացա՞ք, թե իրականում որն է Ալեքսանյանի՝ օղիներ կեղծելու բուն նպատակը. ազգին լավություն անել, տալ հասարակ ռամիկին հնարավորություն՝ ապրելու, արարելու սեփական հայրենիքում՝ շենացնելով պապերի երկիր Հայաստանը…

Որքան էլ ցավալի լինի խոստովանելը, պետք է ասենք, որ նման «բեսպրեդելի» պատճառը ոչ այնքան Ալեքսանյանի հանդգնությունն է, որքան վերևների ամենաթողությունը, իշխանավորների՝ ապօրինությունների վրա աչք փակելու կործանարար սովորությունը: Չնայած նրանց էլ կարելի է հասկանալ. չէ՞ որ, երբ գալիս են ընտրություններն, ու հասունանում է պահը, երբ պետք է զանգվածաբար ընտրակաշառքներ բաժանվեն, կարիք է զգացվում Ալեքսանյանի անհամար միլիոնների: Իսկ ի՞նչ է, մի՞թե ձեզ թվում էր որ սեփական թալանած միջոցներից պետք է հատկացումներ անեին ընտրակաշառքներ բաժանeլու համար: Այդ դեպքում կարո՞ղ եք ասել՝ էլ ո՞րը կլիներ թալանի իմաստը, ո՞րը կլիներ մի ձեռքով վերցնելու, իսկ մյուսով տալու տրամաբանությունը… Ուրեմն՝ հաջողություն մաղթենք Սամվել Ալեքսանյանի գործերին. նա ոմանց դեռ շատ է պետք գալու…

Դավիթ Բաբանով