Դարձյալ Ֆրանսիայից առանձնապես խոշոր չափերի նույն թմրամիջոցը նույն ճանապարհով ՀՀ տեղափոխելու հերթական դեպքը

«Մեր իրավապահների աշխատանքից է կախված՝ «Բուպրենորֆինի» սիրահարները կհամոզվե՞ն, որ սխալ ճանապարհ են ընտրել» վերտառությամբ մեր հրապարակմամբ վերջերս տեղեկացրել էինք Ֆրանսիայից Հայաստան առանձնապես խոշոր չափերի թմրամիջոցների առաքման հերթական դեպքի մասին: Այն, սակայն, իր նպատակին չէր հասել, քանի որ քանի հանցագործությունը 2014թ. նոյեմբերի 22-ին բացահայտվել էր ՀՀ ԱԱԾ աշխատակիցների կողմից, և Հայկ Գևորգյանը, որը փորձել է ձեռք բերել այդ թմրամիջոցը, չի կարողացել ստանալ այն:

Այս անգամ էլ առանձապես խոշոր չափերի թմրամիջոցի ճանապարհը Ֆրանսիայից Հայաստանն է եղել, ինչպես մեկ այլ դեպքի պարագայում, որին անդրադարձել էինք ավելի վաղ: Թմրամիջոցի տեղափոխման եղանակը նույնպես նույնն է եղել՝ փոստային առաքման միջոցով, նույնն է եղել նաև թմրամիջոցի տեսակը՝ «Բուպրենորֆին»: Գրել էինք, որ դատելով ամենից, թմրամիջոցների հանցավոր շրջանառությամբ զբաղվողների համար Ֆրանսիայում այս տեսակի թմրամիջոց ձեռք բերելը համեմատաբար դյուրին է, իսկ փոստային առաքման միջոցով այն Հայաստան հասցնելը՝ փորձված ճանապարհ: Եվ, ահա, դարձյալ նույն պետությունից նույն ճանապարհով առանձնապես խոշոր չափերի նույն թմրամիջոցը Հայաստան տեղափոխելու հերթական դեպքը, որը փաստում է, որ վերոնշյալի առնչությամբ մեր մտահոգությունը միանգամայն հիմնավոր է:

Քրեական գործի նախաքննությամբ պարզվել է, որ Արմեն Հարությունյանը ՀՀ ԱՆ «Նուբարաշեն» ՔԿՀ-ում պատիժ կրելու ընթացքում Ֆրանսիայից առանց իրացնելու նպատակի առանձնապես խոշոր չափի «Բուպրենորֆին» տեսակի թմրամիջոց պարունակող «Սուբոտեքս» դեղահաբեր ձեռք բերելու և դրանք ծանրոցում թաքցված վիճակում «Հայփոստ» ՓԲԸ-ի միջոցով ՀՀ տարածք մաքսանենգությամբ տեղափոխելու գործընթացը կազմակերպելու համար, 2014թ. մայիս-հունիսի ընթացքում հեռախոսակապ է հաստատել Ֆրանսիայում բնակվող, քննությամբ դեռևս չպարզված իր ծանոթի հետ:

Մեղադրական եզրակացության համաձայնության, Ա. Հարությունյանը դրանից հետո թմրամիջոցը փոստային ծառայությունով որևէ մեկի անվամբ Հայաստան առաքելու և այն ստանալու համար հեռախոսակապով դիմել է ՀՀ ԱՆ «Հրազդան» ՔԿՀ-ում պատիժ կրող դատապարտյալ Վահե Կարապետյանին: Վերջինս, ըստ քր. գործի նյութերի, տեղեկություն չունենալով առաքվող ծանրոցում թմրամիջոցի առկայության մասին, համաձայնել է աջակցել այդ հարցով և դասընկերոջից՝ Հայկ Քանքանյանից համաձայնություն ստանալուց հետո, նրա անձնագրային տվալները փոխանցել է Ա. Հարությունյանին, ով էլ, իր հերթին, այն հեռախոսով հայտնել է Ֆրանսիայի Հանրապետությունում գտնվող իր ծանոթին: Այնուհետև Ա. Հարությունյանը կազմակերպել է գործով ինքնությունը չպարզված ոմն Հասան Ակայանի կողմից Ֆրանսիայից մաքսանենգ ճանապարհով առանձնապես խոշոր չափի թմրամիջոցի պարունակությամբ ծանրոցի առաքումը Հայաստան, սակայն, իր կամքից անկախ հանգամանքներում, չի կարողացել ավարտին հասցնել հանցանքը, այսինքն' ապօրինի ձեռք բերել առանձնապես խոշոր չափի թմրամիջոցը:

Վերոնշյալ ձախողման պատճառը եղել է այն, որ Հայաստան առաքված ծանրոցը 2014թ. օգորստոսի 21-ին Աբովյանի փոստային ծառայությունից ստանալուց հետո Հ. Քանքանյանը բերման է ենթարկվել ոստիկանության Կոտայքի բաժին: Հենց այստեղ էլ ծանրոցի զննությամբ հայտնաբերվել են «Բուպրենորֆին» տեսակի թմրամիջոց պարունակող 276 հատ ամբողջական և 8 կտոր «Սուբոտեքս» տեսակի դեղահաբերը:

Բացի վերոնշյալից, թմրամիջոցի ապօրինի շրջանառության և մաքսանենգության դեպքի առթիվ հարուցված սույն քրեական գործի քննության ընթացքում Ա. Հարությունյանը, ըստ մեղադրական եզրակացության, ՀՀ ԱՆ «Նուբարաշեն» ՔԿՀ-ի թիվ 60 խցից 2014թ. սեպտեմբերի 8-ին նույն ՔԿՀ-ի թիվ 003 խուց տեղափոխվելուց հետո, նույն ամսվա ընթացքում զանգահարել է թիվ 60 խցում գտնվող դատապարտյալ Վիլյամ Դանիելյանին և նրա իրավունքներին և օրինական շահերին էական վնաս պատճառող տեղեկություններ (Ֆրանսիայից ծանրոցով ստացված թմրամիջոցն իբր նրան պատկանելու հանգամանքը) քննությանը հայտնելու սպառնալիքով Վ. Դանիերանից պահանջել է խոշոր չափի՝ 2 045 300 դրամին համարժեք 5000 ԱՄՆ դոլար:

Վերը նշված արարքի համար Արմեն Հարությունյանին մեղադրանք է առաջադրվել ՀՀ քրեական օրենսգրքի 34-268-րդ հոդվածի (առանց իրացնելու նպատակի թմրամիջոցների կամ հոգեմետ (հոգեներգործուն) նյութերի ապօրինի շրջանառության հանցափորձը) 3-րդ մասի, 38-215-րդ հոդվածի (մաքսանենգության կազմակերպումը) 2-րդ մասի, 182-րդ հոդվածի («Շորթումը») 2-րդ մասի 3.1 կետի հատկանիշներով: