Հերթական «դեբոշը», այս անգամ էլ' «Լունա 1» գիշերային ակումբի բակում

Երևանի գիշերային ակումբներում հաճախադեպ են տարբեր վեճ ու կռիվները, ծեծկռտուքները և խուլիգանության դեպքերը, որոնք շատ անգամ ուղեկցվում են անձանց կյանքի և առողջության համար վտանգավոր բռնության գործադրմամբ: Այս ամենում իր դերն ունեցավ նաև հեռուստատեսությամբ բռնություն պատկերող ֆիլմերի զանգվածային ցուցադրությունը, որը շարունակվում է 20 տարուց ավելի ու նպաստում նմանաբնույթ դեպքերի ավելացմանը: Ստորև ներկայացվող դեպքն այդպիսի հանցագործություններից ընդամենը մեկն է, հերթականը… Հարկ է, որ ոստիկանությունը հատուկ ուշադրության տակ վերցնի գիշերային ակումբները, քանի որ անցյալում եղել և առաջիկայում էլ կարող են լինել նաև ողբերգական դեպքեր:

Քրեական գործի նախաքննությամբ պարզվել է, որ Սարգիս Գասպարյանը 2015թ. փետրվարի 21-ին, ժամը 02:00-ի սահմաններում «Լունա 1» գիշերային ակումբի բակում խմբով վիճաբանել է ակումբ ժամանած Կ. Քեչեչյանի, Գ. Ալեքսանյանի և քննությամբ դեռևս չպարզված վերջիններիս չորս ընկերների հետ: Ըստ մեղադրական եզրակացության, Ս. Գասպարյանն այդ ընթացքում շուրջ 10-15 րոպե տևողությամբ կյանքի և առողջության համար վտանգավոր բռնություն գործադրելով, կոպիտ կերպով խախտել է հասարակական կարգը և խաթարել ակումբի բնականոն աշխատանքը: Արդյունքում, համաձայն քր. գործի նյութերի, նա վնասել է ակումբի բակում կայանված, Հ. Օհանյանին պատկանող «Toyota Land Cruiser Prado» մակնիշի ավտոմեքենան' ավտոմեքենայի սեփականատիրոջը պատճառելով 117 000 դրամի գույքային վնաս:

Վերը նշված արարքի համար Սարգիս Գասպարյանին մեղադրանք է առաջադրվել ՀՀ քրեական օրենսգրքի 258-րդ հոդվածի («Խուլիգանությունը») 3-րդ մասի 1-ին կետի հատկանիշով: