Գերմանիա մեկնելու մուտքի արտոնագիր ձեռք բերելու պատրվակով

Հայաստանում Եվրոպայի և Միացյալ Նահանգների «վիզա» ձեռք բերելու համար գցվածների պակաս չկա, բազմաթիվ մարդիկ են տուժել նյութապես բարեկեցիկ Արևմուտքում հայտնվելու իրենց փափագի պատճառով, երբ օրինական ճանապարհով արդյունքի հասնելու հույս չունենալով, դիմել են տարբեր միջնորդների օգնության:

Քրեական գործի նախաքննությամբ պարզվել է, որ Սուսաննա Հունանյանը 2800 եվրոյի դիմաց Գերմանիայի Դաշնային Հանրապետություն մեկնելու մուտքի արտոնագիր ձեռք բերելու պատրվակով 2015թ. հունվարի 26-ին Շենգավիթ նոտարական գրասենյակում Գարիկ Հովհաննիսյանից խաբեության և վստահությունը չարաշահելու եղանակով, որպես կանխավճար, վերցրել է 714 406 դրամին համարժեք 1350 եվրո և 60 000 դրամ: Սակայն, ըստ մեղադրական եզրակացության, Ս. Հունանյանը խոստումը չկատարելով, խարդախությամբ հափշտակել է նշված գումարները:

Բացի վերը նշվածից, Ս. Հունանյանը, համաձայն քր. գործի նյութերի, 2700 եվրոյի դիմաց Գերմանիա մեկնելու մուտքի արտոնագիր ձեռք բերելու պատրվակով 2015թ. հունվարի 26-ին դարձյալ նույն նոտարական գրասենյակում Միրաք Գևորգյանից խաբեության և վստահությունը չարաշահելու եղանակով, որպես կանխավճար, վերցրել է 714 406 դրամին համարժեք 1350 եվրո և ևս 100 եվրո' համարժեք 53 981 դրամի, սակայն խոստումը չկատարելով, խարդախությամբ հափշտակել է ընդհանուրը 768 387 դրամի համարժեք այդ գումարը:

Վերը նշված արարքի համար Սուսաննա Հունանյանին մեղադրանք է առաջադրվել ՀՀ քրեական օրենսգրքի 178-րդ հոդվածի («Խարդախությունը») 2-րդ մասի 2-րդ կետի հատկանիշով: