«Աղմկահարույց դատավոր Մնացական Մարտիրոսյանը թքած ունի փաստերի վրա»

Ազատության հրապարակում Ամանորի գիշերը ոստիկանության 4-րդ հատուկ գումարտակի հրամանատար Գեղամ Խաչատրյանի նկատմամբ բռնություն կիրառելու մեջ մեղադրվող «Հիմնադիր խորհրդարանի» անդամ Գևորգ Սաֆարյանի գործն ուղարկվել է Երևանի Կենտրոն և Նորք Մարաշ վարչական շրջանների ընդհանուր իրավասության դատարան։ Ինչպես հայտնի է, գործը գտնվում է հայտնի աղմկահարույց դատավոր Մնացական Մարտիրոսյանի՝ (Մացո) վարույթում:

Սաֆարյանի փաստաբան Տիգրան Հայրապետյանը ԼՈՒՐԵՐ.com-ի հետ զրույցում հայտնեց, որ բացարկ են հայտնելու դատավորին, քանի որ փաստաբանի խոսքով, Մնացական Մարտիրոսյանն այս հարցում կանխակալ վերաբերմունք ունի։ «Գևորգ Սաֆարյանի հետ կապված 4 անգամ բողոք ենք ներկայացրել, և դատավորը 4 անգամ կանխակալ վերաբերմունք է ներկայացրել։ Ինչպե՞ս կարող է այս դատավորը արդար վճիռ կայացնել։ Նա թքած ունի բոլոր փաստերի վրա»,- ասաց  Հայրապետյանը։ Վերջինս դժվարացավ պատասխանել՝ պատահականությո՞ւն էր գործն այս դատավորին հանձնելը Գևորգ Սաֆարյանի գործը, թե՞ ոչ։ Բայց մի բան հստակ է, փաստաբանի խոսքով, Մնացական Մարչտիրոսյանը չի կարող արդար դատավճիռ կայացնել։