Առանձնապես խոշոր չափերով «Մեթիլոնը» Երևանում ստանալով, վրացիներն այն չեն կարողացել հասցնել իր նպատակին

Քրեական գործի նախաքննությամբ պարզվել է, որ Գիորգի Թորաձեն հանցավոր համաձայնության գալով նախաքննությամբ դեռևս չպարզված ոմն Բաչո Տկեբուլաձե և Իրակլի Կալմակելիձե անուն ազգանուններով հանդես եկած անձանց հետ, Իսպանիայի Թագավորությունից Հայաստան առաքվող ծանրոցներում քողարկված թմրամիջոցները ստանալու և Վրաստան տեղափոխելու վերաբերյալ, վերջիններիս ցուցումով 2015թ. սեպտեմբերին նրանց է տրամադրել իր անձնագրային տվյալները:

Այնուհետև Գ. Թորաձեն, ըստ մեղադրական եզրակացության, նախնական համաձայնության գալով Վրաստանի քաղաքացի Էլգուջա Չխուիտիաշվիլիի հետ, 2015թ. հոկտեմբերի 27-ին «Բագրատաշեն» հսկիչ-անցագրային կետով Վրաստանից մուտք գործելով Հայաստանի Հանրապետության տարածք և ժամանելով Երևան, այցելել են Սարյան փողոցի թիվ 22 հասցեում գործող «Հայփոստ» ՓԲԸ փոստային բաժանմունք, որտեղից ստացել են Գ. Թորաձեի անվամբ ՀՀ մաքսային սահմանով մաքսանենգությամբ (ապրանքային այլ տեսք տալու միջոցով մաքսային հսկողությունից թաքցնելով) Իսպանիայից առաքված երկու ծանրոցները' յուրաքանչյուրում մեկական գլանաձև տարաներում համապատասխանաբար 495.45 և 495.95 գրամ քաշով «Մեթիլոն» տեսակի թմրամիջոցի պարունակությամբ:

Դրանից հետո նրանք, համաձայն քր. գործի նյութերի, առանձնապես խոշոր չափերով (991.4 գրամ ընդհանուր քաշով) հիշյալ թմրամիջոցն, առանց իրացնելու նպատակի, ապօրինի պահել են, սակայն այն հայտնաբերվել է ՀՀ ԿԱ ԱԱԾ աշխատակիցների կողմից:
Վերը նշված արարքների համար Գիորգի Թորաձեին մեղադրանք է առաջադրվել ՀՀ քրեական օրենսգրքի 38-215-րդ հոդվածի 2-րդ մասի և 34-38-268-րդ հոդվածի 3-րդ մասի, իսկ Էլգուջա Չխուտիաշվիլիին' 34-38-268-րդ հոդվածի 3-րդ մասի հատկանիշներով:

Շատ հետաքրքիր է' եթե, ըստ նախաքննությամբ պարզված քր. գործի նյութերի, Գ. Թորաձեն իր օտարերկրյա հանցակիցների հետ համաձայնության է եկել հիշյալ թմրամիջոցը ստանալու և Վրաստան տեղափոխելու վերաբերյալ, ապա ինչպե՞ս են այն պահել առանց իրացնելու նպատակի:

Այսինքն` գործ չունե՞նք արդյոք այն դեպքի հետ, երբ քննիչը կամ քննիչները համապատասխան վերաբերմունքի դիմաց մեղադրանքն առաջադրել են անհամեմատ նվազ պատժաչափ (7-15 տարվա ազատազրկման փոխարեն 2-6 տարվա ազատազրկում ) նախատեսող հոդվածով: