Մակետի միջոցով Վ. Պերմյակովը ցույց է տվել, թե ինչպես է մուտք գործել բնակարան և կատարել սպանությունները

2016 թվականի մայիսի 6-ին ռուսական 102-րդ ռազմաբազայի տարածքում տեղի ունեցավ Շիրակի մարզի ընդհանուր իրավասության դատարանի տասնյոթերորդ արտագնա դատական նիստը՝ Ավետիսյանների ընտանիքի սպանության գործով:

Այս դատական նիստին հրապարակվեցին ռուսական կողմի իրականացրած քննչական փորձարարության արդյունքները: Ռազմաբազայում Ավետիսյանների բնակարանի նմանողությամբ կառուցված մակետի միջոցով Վ. Պերմյակովը ցույց է տվել, թե ինչպես է մուտք գործել բնակարան և կատարել սպանությունները: Փորձարարության արդյունքները հայկական կողմին տրամադրվել են միայն արձանագրության տեսքով, որում ներառված լուսանկարները բավական անորակ են: Ինչ վերաբերում է քննչական փորձարարության տեսանկարահանմանը, ապա տեսանյութը հայկական կողմին չի տրամադրվել:

Հրապարակվեցին չորս ռուս զինծառայողներին որպես վկա դատարան հրավիրելու հարցման պատասխանները, համաձայն որոնց՝ վկաները հրաժարվել են հայկական դատարան ներկայանալուց՝ նշելով, որ պնդում են իրենց նախաքննական ցուցմունքները:

Ի պատասխան վկաների նախաքննական ցուցմունքները հրապարակելու վերաբերյալ՝ Դատարանի հարցին՝ տուժողի իրավահաջորդի ներկայացուցիչ, ՀՔԱ Վանաձորի գրասենյակի իրավաբան Արայիկ Զալյանը նշեց, որ դատարանը պարտավոր է ձեռնարկել բոլոր հնարավոր միջոցները՝ վկաների ներկայությունը դատարանում ապահովելու համար:

Քանի որ Դատարանը օտարերկյա քաղաքացուն բերման ենթարկելու լիազորություն չունի, հրապարակվեցին վկաների նախաքննական ցուցմունքները: Դրանց թվում էր նաև Վ. Պերմյակովի ծառայակից Իվան Ժելտովի նախաքննական ցուցմունքը, ըստ որի՝ ամբաստանյալը բնութագրվում է որպես հաղորդակցվող, շեղումներ չունեցող անձ:

Դիմումներ կուղարկվեն նաև մյուս երեք զինծառայողներին որպես վկա դատարան հրավիրելու համար. նրանց թվում են Վ. Պերմյակովի անմիջական հրամանատար Ա. Նիկիշինը և Վ. Պերմյակովին Չիտայից Հայաստան զորակոչած պաշտոնյան:

Տուժողի իրավահաջորդ Լուսինե Սահակյանի կողմից ներկայացված միջնորդությունը՝ Շիրակի մարզի նախկին ոստիկանապետ Վարդան Նադարյանին որպես վկա հարցաքննելու վերաբերյալ, մերժվեց:

Հաշվի առնելով այն հանգամանքը, որ ՀՀ Ոստիկանության կողմից մերժվել էր տրամադրել տուժողի իրավահաջորդ Ա. Զալյանի կողմից դեռևս 2016 թ. մարտի 5-ին ՀՀ Ոստիկանությանն ուղղված գրությամբ պահանջված տեղեկատվությունը՝ Ոստիկանության այն ծառայողների անուն-ազգանունների վերաբերյալ, որոնք մասնակցել են Վ. Պերմյակովի ձերբակալման և ՌԴ Սահմանապահ զորքեր տեղափոխելու գործընթացին՝ Ա. Զալյանը գրավոր միջնորդություն ներկայացրեց դատարանին՝ Ոստիկանության վերոնշյալ աշխատակիցների անուն-ազգանունները պարզելու և վերջիններիս դատարան հրավիրելու վերաբերյալ:

Ավետիսյանների սպանության գործով Շիրակի մարզի ընդհանուր իրավասության դատարանի հաջորդ արտագնա դատական նիստը նշանակված է 2016 թ. մայիսի 13-ին՝ ժամը 12:00-ին: