Մարդ էլ իր կնոջը բռնաբարի՞, այն էլ` որտեղ…

Քրեական գործի նախաքննությամբ պարզվել է, որ նախկինում դատված Անդրանիկ Դավդյանն իր կնոջը' Մարիամ Անանյանին կասկածելով ամուսնական անհավատարմության մեջ, 2015թ. հուլիսի 27-ին, ժամը 01:00-ի սահմաններում նրան տարել է Աբովյան քաղաքի' դեպի 6-րդ միկրոշրջան տանող ճանապարհի ձախակողմյան ամայի տարածքում գտնվող կիսակառույց շինություն:

Այստեղ, ըստ մեղադրական եզրակացության, Ա. Դավդյանը կնոջ հետ բնական սեռական հարաբերության ցանկություն ունենալով, վերջինիս ցուցաբերած դիմադրությունը հաղթահարելու համար ֆիզիկական բռնություն գործադրելով ու սպանության սպառնալիք տալով, այն է' ծեծի ենթարկելով և իր մոտ եղած դանակով սպառնալով, որ կսպանի նրան, հագից հանել է հագուստները և նրա կամքին հակառակ բնական սեռական հարաբերություն ունեցել նրա հետ:

Ավելին. համաձայն քր. գործի նյութերի, այդ ընթացքում չբավարարվելով դրանով, Ա. Դավդյանն իր սեռական կրքերին խաթարված ձևով հագուրդ տալու նպատակով, Մ. Անանյանի նկատմամբ, վերջինիս կամքին հակառակ, կատարել է սեքսուալ բնույթի գործողություններ, որոնք ԶԼՄ-ով ներկայացնելը, հասկանալի պատճառով, պատշաճ չէ:

Վերը նշված արարքների համար Անդրանիկ Դավդյանին մեղադրանք է առաջադրվել ՀՀ քրեական օրենսգրքի 138-րդ հոդվածի («Բռնաբարությունը») 1-ին մասի և 139-րդ հոդվածի («Սեքսուալ բնույթի բռնի գործողությունները») 1-ին մասի հատկանիշներով: