Մեր վճարած հարկերից՝ սուրճ խմողներին

Կառավարության նախաձեռնած՝ ծախսերի կրճատումների հետ կապված երեկ ուշագրավ դիտարկում արեց ԱԺ պատգամավոր Էդմոն Մարուքյանը, նա խորհուրդ տվեց ուսումնասիրել քարտուղարուհիների և օգնականների ինստիտուտը և կրճատումներ իրականացնել նրանց շրջանում: Իսկապես որ, եթե ուշադիր լինենք, կտեսնենք, թե այս փոքր և ոչ հարուստ երկրում քանի՜ պաշտոնյա կա, որ պահում է միաժամանակ գործավարուհի, քարտուղարուհի, մի քանի օգնական, մի քանի խորհրդական, օգնականների օգնականներ ու խորհրդականների խորհրդականներ և անմանատիպ այլ հաստիքներ, որոնց վրա գրանցված են մարդիկ, որոնք, որպես կանոն, պատահական մարդիկ չեն հանդիսանում, այլ' ղեկավարի հետ ինչ-որ կապ ունեցող: Բացի խոշոր պաշտոնյաներից, քանի՜ միջին և նույնիսկ միջինից էլ ցածր պաշտոնյա կա, որ գործավարուհիներ, քարտուղարուհիներ և օգնականներ ու խորհրդականներ են պահում:

Թե ինչ են անում այդքան քարտուղարուհիները, ինչո՞վ են օգնում այդքան օգնականներն ու այդ ինչ խորհուրդներ են տալիս այդքան խորհրդականները, դժվար է պատկերացնել, քանի որ հաճախ նմանատիպ ուռճացված անձնակազմ ունենալու դեպքում մի շարք աշխատակիցների գործառույթները սահմանափակվում են սուրճ եփելով և գրասենյակում սուրճ խմելով՝ օրը մի քանի անգամ: Իսկ աշխատավարձերը տրվում են պետական բյուջեից, մեր վճարած հարկերից…

Ես, իհարկե, հասկանում եմ, որ այդպիսով նույնպես աշխատատեղերի խնդիր է լուծվում, ինչ-որ քանակությամբ մարդիկ աշխատանք են ունենում, թեկուզև սուրճ խմողի աշխատանք, բայց ամեն դեպքում ցանկալի և ավելի արդյունավետ կլիներ, որ մարդիկ աշխատավարձ ստանային այնպիսի աշխատանքի դիմաց, որը նաև ինչ-որ արդյունք կտար, նյութական կամ մտավոր ինչ-որ արտադրանք, գործունեություն և այլն, իսկ սուրճ պատրաստել մանավանդ միջին ու մանր պաշտոնյաները իրենք էլ կարող են, դա ամենևին դժվար չէ:
Եվ իհարկե, բացի ավտոմեքենաներից և գործավարուհի-քարտուղարուհի-օգնական-խորհրդականներից, կուզեի կառավարությանը հիշեցնել նաև պետական գնումների մասին, որովհետև այնտեղ էլ շատ անհարկի ծախսեր են լինում և կրճատումներ անելու զգալի տեղ կա:

Կարեն Վարդանյան