Էլեկտրահարում շոգեբաղնիքում

Քրեական գործի նախաքննությամբ պարզվել է, որ Արթուր Գրիգորյանը 1999թ. դեկտեմբեր 27-ից հանդիսանալով հյուրանոցային ծառայություններ մատուցող և էլեկտրական էներգիայի սպառող «Մուշեղ Գրիգորյան» ՍՊԸ տնօրեն, միաժամանակ նաև էլեկտրատեղակայանքների պահպանման, սպասարկման և շահագործման անվտանգության համար պատասխանատու անձ, 2015թ. հուլիսի 2-ին ընկերությանը պատկանող «Մուշ» հյուրանոցային համալիրի 3-րդ սենյակի շոգեբաղնիքում շահագործել է «էլեկտրակայանքների տեխնիկական շահագործման անվտանգության կանոններ» տեխնիկական կանոնակարգը հաստատելու մասին» ՀՀ կառավարության 23.11.2006թ. թիվ 1933-Ն որոշման 1-ին գլխի 3-րդ բաժնի 6-րդ և 8-րդ կետերին չհամապատասխանող տնայնագործական վառարան:

Իր վերոնշյալ արարքով Ա. Գրիգորյանը, ըստ մեղադրական եզրակացության, չի պահպանել «էլեկտրատեղակայանքների սարքվածքին ներկայացվող ընդհանուր- պահանջներ» տեխնիկական կանոնակարգը հաստատելու մասին» ՀՀ կառավարության 21.12.2006թ, թիվ 1943-Ն որոշման 4-րդ գլխի 26-րդ բաժնի 4-8-րդ կետերի պահանջները, որոնց համաձայն, օրինակ, էլեկտրատեղակայանքի հոսանքատար մասերը չպետք է մատչելի լինեն պատահական հպման համար, իսկ հպման համար մատչելի բաց և կողմնակի հաղորդիչ մասերը չպետք է գտնվեն լարման տակ:
Այս և այլ խախտումների հետևանքով նույն օրը, ժամը 17:00-ի սահմաններում, Աղվան Մանուկյանը օգտվելով վերոնշյալ շոգեբաղնիքից, սայթաքել և ձախ ուսային հոդի շրջանի հետին մակերեսով ընկել է շոգեբաղնիքի էլեկտրատաքացուցիչի վրա, էլեկտրահարվել և մահացել:

Վերը նշված արարքի համար Արթուր Գրիգորյանին մեղադրանք է առաջադրվել ՀՀ քրեական օրենսգրքի 279-րդ հոդվածի («Անվտանգության պահանջներին չհամապատասխանող ապրանքներ թողարկելը կամ իրացնելը, աշխատանքներ կատարելը կամ ծառայություններ մատուցելը») 2-րդ մասի 3-րդ կետի հատկանիշով: