Այսպես վստահության մթնոլորտ չի ձևավորվի

Կառավարությունը ևս 30 ավտոմեքենա է կրճատել, և այդ մասին կառավարության աշխատակազմի ղեկավար-նախարար Դավիթ Հարությունյանն արդեն հայտարարել է: Բայց միայն այդքանը, ուրիշ ոչ մի բան ավել: Այսինքն՝ բացարձակապես անհասկանալի է մնում, թե այդ ի՞նչ ավտոմեքենաներ են կրճատվել: Միգուցե դրանք 1970-80-ականներին արտադրված խորհրդային «ժիգուլինե՞ր» էին, որոնք, միևնույն է, արդեն պիտանի չէին շահագործելու համար: Հնարավոր է, չէ՞: Ես, իհարկե, այդ մասին ոչինչ չգիտեմ և վերը նշվածն ասացի զուտ ենթադրաբար, բայց ամբողջ խնդիրը հենց նրանում է, որ մենք այդ մասին չգիտենք, մեզ այդ մասին տեղեկություն չի տրվում, այսինքն՝ խոսքը մի գործողության մասին է, որը կատարվում է կոռուպցիայի դեմ պայքարի շրջանակում: Այս գործընթացի արդյունավետության և հասրակության կողմից վստահության արժանանալու համար առավելագույնս հստակություն ու թափանցիկություն է պետք ապահովել, իսկ եթե ընդամենը ասվում է, որ 30 մեքենա է կրճատվել, բայց չի ասվում, թե ինչ մեքենաներ են, կամ ի՞նչ ճակատագիր է սպասվում կրճատված մեքենաներին, դա արդեն շատերի մոտ կարող է մի շարք կասկածներ առաջացնել, հետևաբար վստահության մթնոլորտ այդպես չի ձևավորվի:

Օրինակ, կրճատված մեքենաների հետագա ճակատագրի մասին. եթե մենք այդ մասին ոչինչ չգիտենք, բնականաբար, կարող ենք նաև մտածել, որ միգուցե այդ մեքենաները պաշտոնյաները նվիրելու են իրենց բարեկամներին կամ էլ դրանց վաճառքից ստացված գումարները իրենց իսկ դրմապանակներում կամ բանկային հաշիվների վրա են հայտնվելու: Միգուցեև չկա նման բան, սակայն տեղեկատվության պակասի պատճառով յուրաքանչյուրը կարող է այդպես մտածել: Այնինչ Դավիթ Հարությունյանն իր հայտարարության մեջ ուղղակի կարող էր ավելացնել, որ ասենք կրճատված ավտոմեքենաները վաճառվելու են, և վաճառքից ստացված գումարը մուտք է արվելու պետբյուջե: Ընդամենը մեկ-երկու նախադասություն ավելացնելու հարց էր, սակայն կրկին դա չարվեց:

Կարեն Վարդանյան