Վստահ եմ, որ ինչ մասնագիտություն էլ ընտրեք, պետության և հայրենիքի համար պիտանի ու արժանի զավակ եք լինելու. Մանվել Գրիգորյան

ԵԿՄ վարչության նախագահ, Արցախի հերոս Մանվել Գրիգորյանը շնորհավորական ուղերձ է հղել շրջանավարտներին, որում մասնավորապես ասված է.

«Սիրելի՛ շրջանավարտներ,

Եռասերունդ Երկրապահ կամավորականների միության, Հանրապետության բոլոր երկրապահների, 5-րդ բրիգադի մարտիկների, պատանի, երիտասարդ երկրապահների և իմ անունից շնորհավորում եմ ձեզ վերջին զանգի կապակցությամբ: Այսօրվանից դուք մուտք եք գործում կյանքի նոր, ավելի պատասխանատու ու վճռորոշ մի փուլ, որից և սկիզբ է առնելու կյանքի ձեր նոր ճանապարհը: Վստահ եմ, որ ինչ մասնագիտություն էլ ընտրեք, պետության և հայրենիքի համար պիտանի ու արժանի զավակ եք լինելու: Հպարտությամբ եմ խոսում այն տղաների մասին, ովքեր զորակոչվելու են բանակ ու կանգնեն իրենց զինվոր եղբայրների կողքին, հատկապես այս ժամանակահատվածում, երբ հակառակորդին պիտի ցույց տանք մեր միասնական ուժն ու համախմբվածությունը:

Շնորհավորում եմ նաև «Պատանի երկրապահ» կառույցում ընդգրկված բոլոր շրջանավարտներին: Ուրախությամբ պիտի նշեմ, որ այս պատանիները հրամանատարասերժանտական դասընթացների ու դրանք անցկացնող Երկրապահի և գործընկեր կառույցների հմուտ մասնագետների շնորհիվ արդեն կայացած զինվորներ են՝ պատրաստ նվիրվելու հայրենիքի պաշտպանության սուրբ գործին:

Հարգելի՛ շրջանավարտներ, շնորհավորում եմ ձեր ծնողներին, մանկավարժներին, բոլոր նրանց, ովքեր ներդրում են ունեցել գիտելիքների ձեռք բերման, առողջ ու հայեցի դաստիարակման գործում:

Առանձնահատուկ շնորհավորում եմ Արցախ աշխարհի շրջանավարտներին ու մանկավարժներին: Դուք ևս մեկ անգամ ապացուցեցիք, որ թե՛ խաղաղ, թե՛ պատերազմական շրջանում կարող եք դաստիարակել մի այնպիսի սերունդ, որն արժևորում և արժևորելու է թափված արյունն ու տեր է կանգնելու հերոս տղաների շնորհիվ ձեռք բերված անկախությանը:

Ջերմ շնորհավորանքներս աշխարհասփյուռ հայությանը, օտարության մեջ ապրող հայ երիտասարդությանը, շրջանավարտներին, ովքեր հայրենիքից հեռու գտնվելով էլ պահպանում են իրենց ինքնությունը, մայրենի լեզուն, հիշողության մեջ վառ են պահում սեփական ժողովրդի պատմությունը:
Վստահությամբ եմ ասում, որ դուք այն սերունդն եք, ով ոչ միայն կարող է պահպանել, այլև նոր որակներ հաղորդել մեր ազգային արժեքներին, դուք այն սերունդն եք, ով գիտակցում է, որ հաղթանակի ձեռքբերումը նույնքան կարևոր է, որքան դրա պահպանումն ու գալիք սերունդներին փոխանցումը: Հավատացե՛ք, որ Երկրապահը, ձեր հայրերն ու պապերն ամեն ինչ արել են, այսուհետ էլ ամեն ինչ անելու են, որ խաղաղ բացվեն հայոց երկրի արշալույսները, որ ոչ մի դեպքում չվտանգվի ձեր լուսավոր ապագան: Ապրիլյան թուրքական սադրանքին հասցված հայկական հուժկու հակահարվածն էլ փաստեց, որ մենք' ՀՀ նախագահ, զինված ուժերի գերագույն գլխավոր հրամանատար Սերժ Սարգսյանի առաջնորդությամբ, ի վիճակի ենք երաշխավորել Հայաստանի, Արցախի անվտանգությունը, ամբողջականությունն ու ինքնիշխանությունը:

Ինչ ճանապարհով էլ որ քայլեք, հիշե՛ք, որ դուք հաղթանակած սերնդի ժառանգորդ եք, հիշե՛ք, որ անմահ հերոսների՝ ձեզ փոխանցած ազատությունն ու անկախ ապրելու իրավունքը սրբորեն պիտի պահպանեք: Դուք եք լինելու այս երկրի տերը, նոր հաղթանակները դուք եք գրելու:

Եվս անգամ շնորհավորում եմ բոլոր շրջանավարտներին՝ մաղթելով բազում հաջողություններ, արդարացված սպասումներ, մեր երկրին ու սահմանը հսկող զինվորներին՝ խաղաղություն, անկոտրում կամք ու անսահման ուժ և եռանդ:

Այսօրվանից կյանքի նոր հորիզոններ են ձեր առջև բացվում: Հավատացե՛ք ինքներդ ձեզ, ձեր ապագային ու վստահ եղեք, որ ձեր օրն ու կյանքի յուրաքանչյուր փուլը դուք եք կերտում:

Թո՛ղ բարի հնչի դպրոցական վերջին զանգը…»: