«Հայաստան» հիմնադրամի «Մարաթոն-2016»-ի հասույթը կուղղվի քառօրյա պատերազմի ավերածությունների վերացմանը

 «Եթե այլ առաջարկներ չլինեն, երևի թե դա կընդունվի որպես այս տարվա գլխավոր ռազմավարական թեմա»,- «Արմենպրես»-ի փոխանցմամբ՝ լրագրողներին «Մարաթոն-2016»-ի հասույթը քառօրյա պատերազմի հետևանքների վերացմանն ուղղելու մասին հայտնեց հիմնադրամի գործադիր տնօրեն Արա Վարդանյանը: Հարցին ի պատասխան, թե որքան գումար կպահանջվի ծրագրի իրագործման համար՝ Արա Վարդանյանը նշեց, որ ԼՂՀ կառավարությունն սկսել է հաշվարկները, բայց դեռ չի կարող ասել, թե որքան գումար է անհրաժեշտ:

«Օժանդակությունը պետք է լինի բազմաշերտ՝ սկսած դեղորայքի առաքումից մինչև տների վերանորոգում, ընտանիքներին աջակցության տրամադրում: Այն ընտանիքներում, որտեղ եղել են զոհվածներ, ավելի մեծ օգնություն կտրամադրվի: Աջակցության ձևերը դեռ կոնկրետացման փուլում են»,- հավելեց հիմնադրամի տնօրենը:

Անդրադառնալով հարցին, որ վերջին մեկ ամսվա ընթացքում տարբեր կողմերից դրամական աջակցություն է տրամադրվել պատերազմի հետևանքների վերացմանը, արդյոք դեռ բացեր կան՝ Արա Վարդանյանը նշեց. «Բացը միշտ էլ լինելու է, քանի որ քառօրյա պատերազմի ավերածություններից բացի, Արցախում կան բազմաթիվ խնդիրներ՝ լինի ջրատարների կառուցում, դպրոցների շինարարություն և այլն: Պարզապես այս տարի ավելի շատ կենտրոնանալու ենք այն շրջանների վրա, որոնք ավելի շատ են վնասվել այդ օրերի ընթացքում»:

ՀՀ նախագահ Սերժ Սարգսյանի գլխավորությամբ՝ մեկնարկեց «Հայաստան» համահայկական հիմնադրամի հոգաբարձուների խորհրդի և տեղական մարմինների 25-րդ համատեղ նիստը: Հոգաբարձուների խորհրդի 33 անդամներից ներկա է 29-ը, ներկա են տեղական մարմինների 24 ներկայացուցիչներ, քվորումն ապահովված է, սկսվեց նիստի աշխատանքը: Հոգաբարձուների խորհրդի նիստին մասնակցելու համար Երևան է ժամանել Լեռնային Ղարաբաղի Հանրապետության նախագահ Բակո Սահակյանը, ով զեկույց կներկայացնի «Հայաստան» համահայկական հիմնադրամի Մարաթոն 2016-ի նպատակաուղղվածության մասին: