Գևորգ Կոստանյանը մերժեց նաիրիտցիներին (լուսանկարներ)

Մայիսի 26-ին «Նաիրիտ» գործարանի աշխատակիցները ՀՀ Գլխավոր դատախազություն դիմում էին ուղարկել։ Դեռևս անցած տարի գործարանի աշխատակիցները պայմանագիր էին կնքել, ըստ որի, հրաժարվում են աշխատավարձի ուշացման տույժ-տուգանքներից, հակառակ դեպքում՝ աշխատավարձերը չեն ստանա։ Նաիրիտցիները ստորագրեցին այդ պայմանագրերը։ Այն ժամանակ էլ նրանք բազմիցս հայտարարել էին, որ իրենք ստիպել են ստորագրել այդ պայմանագիրը։ Այսօր արդեն գործարանի նախկին աշխատակիցները պահանջում են տույժ-տուգանքները ստանալ և շանտաժի հիմքով քրեական գործ հարուցել։

Այսօր նախագահական նստավայրի դիմաց կրկին հավաքվել էին գործարանի նախկին աշխատակիցները։ Կարինե Շահվերդյանը հայտարարեց, որ դատախազությունը մերժել է իրենց դիմումը։ «Մեր այդ դիմումին պատկան մարմինները լուրջ չեն վերաբերվել և ուղղորդել են դիմելու այլ մարմինների՝ քաղաքացիաիրավական հարցերով, ոչ թե քրեական։ Դատախազության պատասխանում նշված է, որ մեր դիմումի մեջ նշված չեն տվյալներ, որոնք կվկայեն հանցագործության առկայության մասին։ Դիմումում քննարկվել են քաղաքացիաիրավական հարցեր»,- ներկայացրեց գործարանի աշխատակիցը։

ԼՈՒՐԵՐ.com-ի հետ զրույցում նաիրիտցիները նշեցին, որ պայքարը շարունակում են և վաղը՝ հինգշաբթի օրը, ժամը 11։00-ին հավաքվում են Կառավարության դիմաց։ 

Հիշեցնենք, որ նաիրիտցիներին այդ փաստաթուղթը ստորագրել ստիպել է Էներգետիկայի և բնական պաշարների նախկին նախարար Երվանդ Զախարյանը։ Նրա պաշտոնավարման ժամանակ կազմվեց այդ պայմանագիրը, որն էլ նաիրիտցիները, այլընտրանք չունենալով, ստիպված ստորագրեցին, որպեսզի աշխատավարձ ստանան։