Հայաստանում երեխաների համար խնամքի այլընտրանքային ծառայություններ կգործեն

Երեխաների խնամքի հարցը միշտ պետք է գտնվի հասարակության ուշադրության կենտրոնում: Յուրաքանչյուր երեխա՝ առանց բացառության պետք է ապրի ընտանեկան միջավայրում, հաճախի իր համայնքի դպրոց և ստանա ներառական կրթություն: 10 տարի առաջ Հայաստանում երեխաների խնամքի տարբեր տեսակի հաստատություններում բնակվում էին շուրջ 11 հազար երեխա, 2015 թվականի վերջին այդ թիվը հասել է 3500-ի, այսինքն՝ կրճատվել է 75 տոկոսով: Այս մասին լրագրողների հետ քննարկման ընթացքում հայտնեց Հայաստանում ՄԱԿ-ի մանկական հիմնադրամի (ՅՈՒՆԻՍԵՖ-ի) ներկայացուցիչ Տանյա Ռադոչայը:

«Հայաստանում կան երեխաներ, ովքեր իրենց ներուժն ամբողջովին չեն օգտագործում: Աղքատությունը, խաթարված ֆունկցիաներով ընտանիքը, հաշմանդամությունն այն հիմնական պատճառներն են, որոնց պատճառով երեխաները հայտնվում են խնամքի կենտրոններում: Երեխաները չպետք է հայտնվեն խնամքի հաստատություններում աղքատության պատճառով, դրա համար պետք է աջակցություն ցույց տալ նրանց ընտանիքներին: Մեծ ջանքեր են գործադրվում խնամքի տարբեր տեսակի հաստատություններում գտնվող երեխաների թիվը կրճատելու համար: Յուրաքանչյոր անհատի զարգացման համար պետք է անհատական վերաբերմունք ցուցաբերել, իսկ խնամքի հաստատություններում այդպիսի անհատական վերաբերմունք չի ցուցաբերվում: Մեր նպատակը անհատականացված և սատարող խնամք ցուցաբերելն է յուրաքանչյուր երեխայի»,-ասաց Ռադոչայը:

«Հայաստանում պետական մանկատների թիվը 8-ից դարձել է 6, երեխաները վերադարձվել են կենսաբանական ընտանիքներին, դա տեղի է ունեցել միջազգային և տեղական մարմիների աջակցությամբ ու համագործակցության արդյունքում: Կենսաբանական ընտանիքից դուրս երեխան պետք է հնարավորինս իր համայնքին մոտ լինի:
Այս պահին 17 երեխա խնամք է ստանում խնամատար ընտանիքներում: Ընդհանուր առմամբ 2008 թվականից սկսած շուրջ 65 երեխաներ խնամք են ստացել խնամատար ընտանիքներում»,-նշեց ՀՀ աշխատանքի և սոցիալական հարցերի նախարարության երեխաների հիմնահարցերի բաժնի պետ Լենա Հայրապետյանը:
Նշվեց նաև, որ Հայաստանում գործում է 23 հատուկ դպրոց, որոնք պետք է վերափոխվեն մանկավարժահոգեբանական կենտրոնների: Ծրագրվում է, որ յուրաքանչուր մարզում առնվազն 1 և Երևանում առնվազն 4 հատուկ դպրոց պետք է վերափոխվի մանկավարժահոգեբանական կենտրոնի մինչև 2022 թվականը: