Հարցերը լուծել են…

Չնայած արդարացիորեն համարվում է, որ ՀՀ երկրորդ քաղաքի համարում ունեցող Գյումրին երկրի ամենաաղքատ բնակավայրերից է, ուր մեկ շնչին բաժին ընկնող եկամուտը ռեկորդային ցածր ցուցանիշներ է գրանցում հատկապես վերջին մի քանի տարիներին, սակայն, Գյումրու քաղաքապետի աթոռը միշտ էլ եղել ու մնում է խիստ բաղձալի գրեթե ցանկացածի համար, ով, ինչպես ասում են, պրոֆեսիոնալ հիմունքներով զբաղվում է քաղաքականությամբ: Իրականում շատ քիչ պաշտոններ կան Հանրապետությունում, որոնք կարող են իրենց եկամտաբերությամբ մրցակցել քաղաքապետի շատոնի հետ:

Ինչպես հայտնի է, շուտով Գյումրիում քաղաքապետի ընտրություններ են կայանալու: Ինչպես նախորդ տարիներին, այս տարի ևս սպասվում է, որ գործընթացները բավական թեժ են լինելու, իսկ աթոռն այդ թեկնածուների համար դառնալու է կենացմահու պայքարի օբյեկտ: Ընդհանրապես, այնպիսի տպավորություն էր, թե իշխանությունները չէին շտապում հայտարարել այն մարդու անունը, ով պետք է հանդես գար ՀՀԿ անվան տակ՝ կարծես կամուկացի մեջ լինելով՝ ով կարող է իր վրա արժանապատվորեն կրել ընդդիմադիր Գյումրիին առաջիկայում սանձելու առաքելությունը:

Դատելով վերջին օրերին մամուլ սպրդած տեղեկություններից՝ իշխանությունները կանգ են առել Սամվել Բալասանյանի թեկնածության վրա ու փորձելու են հիմա էլ նրանից օրինակելի հանրապետական կերտել, մեկից, ով կարճ ժամանակահատվածում հասցրել է մի քանի կուսակցություն փոխել: Թե հատկապես ինչով է պայմանավորված, ասենք, Վարդան Ղուկասյանի փոխարեն Սամվել Բալասանյանի անձին վերապատվություն տալը, թերևս, կիմանան միայն հանրապետականները, բայց դատելով ամենայնից՝ ՀՀԿ-ում «մինչև կոկորդը» կուշտ են առաջինի օդիոզ պահվածքից, որն իր պաշտոնավարման տարիներին հասցրել է ընկնել մի շարք մութ պատմությունների մեջ ու վերջնականապես հեղինակազրկվել՝ չնայած այն հանգամանքին, որ մշտապես հլու-հնազանդ ծառայել է հարազատ կուսակցույանն ու հիմա էլ պատրաստակամ է սեփական գրպանի հաշվին առաջ տանել ՀՀԿ շահերը:

Պակաս ուշագրավ չէ նաև այն, որ իշխանությունների «դաբրոն» ոչ մի կերպ չկարողացավ վաստակել մեկ այլ գործիչ ևս՝ Մարտուն Գրիգորյանը, ով, ինչպես հայտնի է, ԱԺ պատգամավոր է, ու թեպետ հասցրել էր դուրս գալ ԲՀԿ-ից՝ ապացուցելու համար իր նվիրվածությունը ՀՀԿ-ին, սակայն «չբաշարեց» հասնել այն բանին, որ հենց ինքը դառնար կուսակցության հիմնական թեկնածուն հարազատ քաղաքում, մի բան, որին այնքան ձգտում էր Գրիգորյանը. ստիպված է բավարարվել առաջիկա գումարման ԱԺ-ում սեփական տեղն ունենալու վերաբերյալ երաշխիքներով՝ քաղաքապետի կարիերան թողնելով ապագային:

Չնայած ՀՀԿ-ն չէր շտապում անուններ հնչեցնել, բայց արդեն իսկ պարզ է, որ հանդես է գալու Սամվել Բալասանյանի թեկնածության օգտին: Թեպետ սկզբնական շրջանում լուրեր էին շրջանառվում, որ ավելի հավանական է Բալասանյանի թեկնածության առաջադրումը ՀՅԴ ցուցակով, բայցևայնպես, ստացվեց այնպես, որ ՀՀԿ-ն ավելի նպատակահարմար գտավ իրենով անել Բալասանյանին: Թե ինչու հատկապես Բալասանյանին, ենթադրությունները շատ են. նա մեկն է, ով երբեք ավելորդ ինքնագլխություն չի դրսևորի, մեկն է, ով ամենևին էլ չի կարող պարծենալ սեփական սկզբունքայնությամբ (քաղաքականության մեջ սկզբունքայիններին չեն սիրում), ասում են նաև, որ պակաս դերակատարություն չի ունեցել «ԳԱԼԱ» կուսակցության ստեղծումը, որը, հանդես գալով ընդդիմադիր դիրքերից, լուրջ սպառնալիք է դարձել իշխանություններին:

Ովքեր էլ լինեն քաղաքապետի թեկնածուներ, ում էլ իշխանությունները սատարեն, փաստ է, որ դրանից շարքային գյումրեցու կյանքում շատ քիչ բան է փոխվելու. բոլորն էլ սեփական կարիերայի հարցերն են փորձում լուծել, ամենքին էլ մեկ հարց է հետաքրքրում՝ հնարավորինս շատ անձնական ունցեվածք կուտակելը, ինչի համար քաղաքապետի պաշտոնը որպես անփոխարինելի գործիք կարող է ծառայել. շուտով նոր ֆինանսական մուտքեր են սպասվում քաղաքապետարանի բյուջե, որի տնօրինումն ամբողջությամբ գտնվելու է քաղաքապետի վերահսկողոթյան տակ…

Դավիթ ԲԱԲԱՆՈՎ