Հայաստանի տարածքի 43 տոկոսը ենթարկվում է անապատային երևույթների ազդեցությանը

2015 թվականի տվյալներով՝ Հայաստանի տարածքի 43 տոկոսը ենթարկվում է անապատային երևույթների ազդեցությանը:

Այս մասին նշեց Բնապահպանության նախարարության կենսառեսուրների կառավարման գործակալության պետի տեղակալ, Հայաստանում ՄԱԿ-ի անապատացման դեմ պայքարի կոնվենցիայի ազգային համակարգող Աշոտ Վարդևանյանը:

«Դրանք հիմնականում Արարատի, Արմավիրի, Գեղարքունիքի և Կոտայքի մարզերում են: Այլ մարզերում նույնպես կան նման տարածքներ, սակայն այդքան շատ չեն: Պատճառները տարբեր են' գյուղատնտեսության գործընթացը ոչ ճիշտ վարելը, որը բերում է հողերի դեգրադացիայի: Հողակտորների փոքր լինելու պատճառով ցանքաշրջանառություն չի իրականացվում, մեծ տեխնիկա հնարավոր չէ օգտագործել: Այլ տարածաշրջանում, ասենք ալպիան գոտիներում, կարող է պատճառը լինել գերարածեցումը: Հիմնականում համայնքներին մոտ գտնվող արոտավայրերն են ենթարկվում անապատացման երևույթների, դեգրադացիայի»,-ասաց Աշոտ Վարդևանյանը: Ըստ նախարարության ներկայացուցչի' 2015 թվականի դեգրադացման ցուցանիշը նախորդ տարիների համեմատ առանձնապես չի փոխվել, ընդհանուր առմամբ նույն պատկերն է:

Նրա խոսքով, անապատացման պատճառ է նաև անտառների հատումը: Անտառային էկոհամակարգերն ապահովում են հողերի կայունությունը շատ երկար տարիների կտրվածքով: Հայաստանում նախորդ տարի մեկ տարվա ընթացքում վերականգնվել և անտառապատման աշխատանքներ է իրականացվել մոտ 340 հա տարածքի վրա: Ըստ նրա' սա մեծ ցուցանիշ չէ, սակայն դրական է, որ արդեն իսկ գործընթացն սկսվել է, հնարավորություն կա ակնկալել այդ տարածքների ընդլայնումը:

Աշոտ Վարդևանյանի կարծիքով, գյուղատնտեսական ոչ պիտանի հողերը, որոնք ցածր արդյունավետություն ունեն, ճիշտ կլինի փոխադրել անտառային հողերի կատեգորիա և փորձել այդ տարածքներն անտառապատել: Այդ դեպքում տարածքները կվերականգվեն և դրանք էլ իրենց հերթին չեն թողնի, որ հարակից տարածքները դեգրադացվեն: Դա համաշխարհային պրակտիկայում ընդունված տարբերակ է: Նա նկատեց, որ դեգրադացված հողերը կարելի է վերականգնել, սակայն դա կախված է դեգրադացման աստիճանից: Այդ ուղղությամբ ևս աշխատանքներ են իրականցվում:

Անդրադառնալով գյուղատնտեսական հողերի ներկա վիճակին' Աշոտ Վարդևանյանը նշեց, որ, ընդհանուր առմամբ, այդ հողերը գտնվում են ռիսկային գոտում: Խնդիրների լուծման համար անհրաժեշտ է հողերը միավորել, դա թույլ կտա տարբեր միջոցառումներ իրականացնել, մասնավորապես, հողաշինարարական, որը հնարավոր չէ իրականացնել փոքր հողակտորի վրա: